امریکہ کے صدر براک اوباما تین روزہ تعطل کے بعد صدارتی انتخاب کے لیے اپنی مہم جمعرات سے دوبارہ شروع کر رہے ہیں۔
انہوں نے امریکہ کے شمال مشرقی علاقوں میں آنے والے سمندری طوفان سینڈی سے ہونے والی تباہی سے نمٹنے کے لیے اپنی مہم ملتوی کر دی تھی۔
رپبلکن پارٹی کے صدارتی امیدوار مِٹ رومنی نے اپنی مہم بدھ کو ہی دوبارہ فلوریڈا کی اہم ریاست سے شروع کر دی تھی۔
امریکہ میں صدر کے عہدے کے لیے چھ نومبر کو انتخاب ہو گا اور یہ انتخابی مہم کا آخری ہفتہ ہے۔
براک اوباما طے شدہ منصوبے کے مطابق جمعرات کو نیوادا، کولوراڈو اور وسکونسن میں انتخابی مہم کا دوبارہ آغاز کریں گے۔
اس سے پہلے بدھ کو انھوں نے رپبلکن گورنر کرس کرسٹی کے ساتھ نیو جرسی کے طوفان زدہ علاقوں کا دورہ کیا۔
اٹلانٹک شہر میں ایک ایمرجنسی پناہ گاہ کے دورے کے موقع پر صدر براک اوباما نے کہا ’ آپ لوگ میری دعاؤں میں ہیں، ہمیں یہاں بہت کام کرنا ہے۔‘
عوامی جائزوں سے اندازہ ہوتا ہے کہ دونوں امیدواروں، صدر براک اوباما اور مٹ رومنی کے درمیان کانٹے کا مقابلہ ہوگا۔
اخبار واشنگٹن پوسٹ اور اے بی سی کی سروے کے مطابق دس میں سے آٹھ لوگوں نے سینڈی طوفان سے پیدا ہونے والی ایمرجنسی صورت حال سے نمٹنے پر صدر براک اوبامہ کو’بہت خوب‘ یا ’اچھا‘ کہا ہے۔
نیوجرسی کے ریپبلکن گورنر نے بھی ڈیموکریٹ صدر کی قائدانہ صلاحیتوں کی بہت تعریف کی ہے۔
اس موقع پر نیوز کانفرنس سے خطاب کرتے ہوئے صدر کا کہنا تھا کہ انہوں نے اپنی ٹیم کے ساتھ ایک قانون بنا رکھا ہے کہ آفت کے سلسلے میں وفاقی مدد مانگنے والے کسی بھی گورنر یا میئر کو پندرہ منٹ میں جواب دیا جائے۔
انہوں نے کہا تھا کہ وہ اس معاملے میں ’بیوروکریٹک ریڈ ٹیپ‘ برداشت نہیں کریں گے۔
سینڈی طوفان کے بعد امریکہ کی متاثرہ ریاستوں میں لوگ باہر نکلے ہیں اور اپنی زندگی دوبارہ شروع کرنے کی کوشش میں ہیں۔ نیویارک کی ایک سڑک پر ایک شخص فلیش لائٹس فروخت کررہا ہے۔
سردی سے بچنے کے لیے لوگ آگ جلا کر سینک رہے ہیں۔
سینڈی طوفان کے بعد پہلی بار نیویارک شہر میں بسیں چلیں۔ مسافروں سے بھری یہ بس لوگوں کو ان کی منزل پر لے جارہی ہے۔
سڑکوں سے ملبے کو ہٹانے کے لیے سرکاری مشینری حرکت میں نظر آ رہی ہے۔
سینڈی طوفان کے بعد لوگ باہر نکلے ہیں اور اس واقعے کو بھلانے کے لیے دو نوجوان خواتین ایک شراب خانے میں بیٹھی ہیں۔
گھروں کے باہر کھڑے کئی درخت جڑ سے اکھڑ گئے ہیں جن کی موجودگی میں لوگ اپنے گھروں کو واپس آرہے ہیں۔
شاید یہ شخص ملبے کے درمیان اپنے گھر کا کچھ سامان تلاش کررہا ہے۔
کیوبا کے شہر ہوانا کے قریب یہ شخص اپنے گھر کی چھت ٹھیک کررہا ہے جو طوفان کے نتیجے میں اکھڑ گئی تھی۔
نیویارک کے اس علاقے میں صرف سڑک کنارے اس کھانے کی دوکان میں بجلی ہے باقی پورا شہر اندھیرے میں ڈوبا ہے۔
طوفان کے ختم ہونے کے بعد ایک خاتون پبلک فون بوتھ سے کال کررہی ہیں۔
