روس یوکرین جنگ: امریکہ نے یوکرین کو جنگی طیارے بھجوانے کی پولش تجویز کیوں مسترد کی
،تصویر کا ذریعہGetty Images
یوکرین اپنے مغربی اتحادیوں سے بار بار جنگی طیارے مہیا کرنے کا مطالبہ کر رہا ہے۔
یوکرین کے صدر ولادیمیر زیلنسکی نے منگل کو ویڈیو لنک کے ذریعے برطانوی پارلیمنٹ سے خطاب کرتے ہوئے شکوہ کیا کہ ’تیرہ روز سے ہم سے وعدے کیے جا رہے ہیں۔ وہ تیرہ روز سے ہمیں کہہ رہے ہیں کہ وہ فضا میں ہماری مدد کریں گے، اور وہاں جہاز ہوں گے۔‘
لیکن یوکرین کو صرف طیاروں کی ضرورت نہیں بلکہ مِگ 29 جیسے روسی ساختہ طیاروں کی ضرورت ہے جنہیں یوکرینی پائلٹ اڑا سکتے ہیں۔
روسی ساختہ جنگی طیارے صرف چند یورپی ممالک کے پاس ہیں جو ماضی میں کمیونسٹ بلاک کا حصہ تھے۔
،تصویر کا ذریعہGetty Images
پولش تجویز مسترد
یوکرین کے پڑوسی ملک پولینڈ نے منگل کے روز اپنے تمام مِگ طیاروں کو جن کی کل تعداد 28 ہے، جرمنی میں نیٹو کے ایئربیس رامسٹین پہنچانے کی پیشکش کی تھی۔ پولینڈ نے کہا تھا کہ وہ تمام جہازوں کو امریکہ کے حوالے کر دے گا اور وہ ان طیاروں کو یوکرین کو دے سکتا ہے۔
پولینڈ کا کہنا ہے کہ اس کو مِگ 29 طیاروں کے بدلے میں امریکی ساختہ طیارے فراہم کر دیے جائیں۔
پولینڈ نے نیٹو اتحاد کے دوسرے ممبر ممالک سے بھی کہا ہے کہ وہ بھی روسی ساختہ طیارے یوکرین کو دے دیں۔
پولینڈ کے علاوہ بلغاریہ اور سلواکیہ کے پاس بھی روسی ساختہ طیارے ہیں۔
End of سب سے زیادہ پڑھی جانے والی
لیکن امریکہ پولینڈ کی پیشکش کے بارے میں زیادہ پرجوش نہیں ہے اور سمجھتا ہے کہ یوکرین کو طیارے فراہم کرنا اچھا خیال نہیں ہے۔
پینٹاگون کے ترجمان جان کربی نے کہا ہے کہ پولش تجویز سے پورے نیٹو اتحاد کے بارے میں تشویش بڑھ جاتی ہے۔
پینٹاگون کے ترجمان نے کہا ’ہم اس مسئلے پر اپنے نیٹو اتحادیوں اور پولینڈ سے بات چیت کرتے رہے ہیں ۔۔۔ لیکن ہم نہیں سمجھتے کہ پولینڈ کی تجویز قابل عمل ہے۔‘
روس کا یوکرین پر حملہ: ہماری کوریج
بی بی سی لائیو پیج: یوکرین پر روس کا حملہ، تازہ ترین صورتحال
پینٹاگون کے ترجمان نے کہا کہ کسی ایسے آپریشن کو انجام دینے کا کوئی ’معقول جواز‘ نہیں ہے۔
البتہ امریکہ کی نائب صدر کمالا ہیرس پولینڈ اور رومانیہ کے دورے کے دوران یوکرین کو جنگی طیارے فراہم کرنے کے حوالے سے بات چیت کریں گیں اور یہ معاملہ ان کے ایجنڈے پر ہے۔
مکمل جنگ کا خوف
امریکہ نیٹو کو روس کے ساتھ براہ راست جنگ سے بچانا چاہتا ہے۔
روس نے رواں ہفتے خبردار کیا ہے کہ اگر کسی ملک نے اپنے اڈے یوکرین کے حوالے کیے تو اسے یوکرین کی جنگ میں شریک تصور کیا جائے گا۔
پولینڈ کی تجویز کے مطابق مِگ 29 جرمنی میں امریکہ یا نیٹو کے ہوائی اڈے سے اڑ کر یوکرین کی فضائی حدود میں روسی افواج کے خلاف کارروائیاں کریں گے۔‘
،تصویر کا ذریعہGetty Images
روس اس عمل کو نیٹو ملک کی جانب سے روس کے خلاف جارحانہ کارروائی تصور کر سکتا ہے جس سے اس کو اس جنگ کو وسیع کرنے کا بہانہ میسر آ سکتا ہے۔
مغرب میں اس وقت سب سے بڑا خوف روس کے یوکرین پر حملے کے مغربی یورپ تک پہنچنے کا خوف ہے۔ اور اس سے زیادہ قابل تشویش بات یہ ہے کہ یہ جنگ کہیں جوہری جنگ میں نہ بدل جائے۔.
’ہم سے مشاورت نہیں ہوئی‘
امریکہ کی جانب سے پولینڈ کی تجویز کو مسترد کرنے کی ایک وجہ پولینڈ کی جانب سے بغیر کسی مشاورت کے تجویز پیش کرنا ہے۔
امریکہ کی وزارت خارجہ کی ڈپٹی سیکرٹری وکٹوریہ نولینڈ نے کہا ہے کہ ماضی میں یوکرین کو طیارے مہیا کرنے کی تجویز پر کوئی مشاورت نہیں ہوئی ہے۔
یوکرین پر روس کے حملے کے بعد سے پولینڈ نے یوکرین کو اسلحہ فراہم کیا ہے لیکن یوکرین کو جنگی طیارے فراہم کرنے سے انکار کیا ہے۔
لیکن اب پولینڈ نے جو تجویز پیش کی ہے اس میں زیادہ ذمہ داری امریکہ پر ڈالی گئی ہے۔
جرمنی نے بھی پولینڈ کی تجویز سے لاتعلقی کا اظہار کیا ہے اور کہا ہے کہ پولینڈ کے طیاروں کو یوکرین کے حوالے کرنے کی کوئی تجویز زیر غور نہیں ہے۔
،تصویر کا ذریعہGetty Images
اس کے علاوہ نیٹو ممبران کو یہ بھی خدشہ ہے کہ یوکرین جو مسلسل روسی حملوں کی زد میں ہے اس کے پاس کوئی قابل استعمال ہوائی اڈہ بچا ہی نہیں ہے جس کی وجہ سے یہ تجویز ناقابل عمل ہے۔
رواں ہفتے امریکہ نے یوکرین کو اسلحے کی فراہمی تیز کر دی ہے۔
امریکہ نے کہا ہے کہ وہ اپنے پیٹریاٹ میزائیلوں کو پولینڈ منتقل کر رہا ہے تاکہ امریکہ یا اس کے کسی اتحادی پر ممکنہ حملے کے خطرے سے نمٹا جا سکے۔
