ملکہ الزبتھ اور شہزادہ ہیری شاہی جوڑے کے مستقبل پر بات چیت کے لیے ملاقات کریں گے

برطانوی شہزادے ہیری کی جانب سے شاہی فرائض سے دستبردار ہونے کے اعلان کے بعد اب وہ پیر (کل) کو ملکہ الزبتھ سے ایک بالمشافہ ملاقات کریں گے جس میں وہ اپنے اور اپنی اہلیہ ڈچز آف سسیکس میگھن مارکل کے مستقبل کے کردار پر تبادلہ خیال کریں گے۔

ڈیوک اور ڈچز آف سسیکس نے اپنے انسٹاگرام اکاؤنٹ پر ایک پوسٹ میں کہا تھا کہ وہ شاہی خاندان کی ’سینیئر‘ شاہی حیثیت سے دستبردار ہونے کا ارادہ رکھتے ہیں اور مالی طور پر خودمختار ہونے کے لیے اقدامات کریں گے۔

اسی حوالے سے شاہی محل کے اہلکاروں نے بی بی سی کو بتایا ہے کہ پیر کو ملکہ برطانیہ الزبتھ اور شہزادہ ہیری کے درمیان ملاقات میں شہزادہ چارلس اور شہزادہ ولیم بھی موجود ہوں گے۔

تاحال اس حوالے سے کوئی اطلاعات نہیں کہ ملکہ کے ساتھ ہونے والی اس نشست میں کوئی حتمی فیصلہ ہو پائے گا۔

یہ بھی پڑھیے

شہزادہ ولیم اپنے بھائی ہیری کے لیے ’فکرمند‘

میگھن اور ہیری کینیڈا میں ہی کیوں رہنا چاہتے ہیں؟

شہزادہ ہیری، میگھن اخراجات کیسے پورے کریں گے؟

بی بی سی کے شاہی نمائندے جونی ڈائمنڈ پُرامید ہیں کہ یہ مذاکرات اس بات کا تعین کریں گے کہ شہزادہ ہیری اور ان کی اہلیہ میگھن کے شاہی خاندان کے ساتھ مستقبل میں کیا تعلقات ہوں گے۔ ملکہ الزبتھ بھی آنے والے دنوں میں اس معاملے کا حل نکالنے کی خواہش رکھتی ہیں۔

تاہم انھوں نے مزید کہا ہے کہ اب بھی کئی ’بڑی رکاوٹیں‘ موجود ہیں جن کے بارے میں ان مذاکرات میں بات ہو گی۔

خیال ہے کہ شاہی جوڑے کے اعلان کے بعد شہزادہ چارلس، شہزادہ ولیم اور شہزادہ ہیری مستقبل کے بارے میں متعدد امکانات کا جائزہ لیں گے۔ اگر آئندہ دنوں میں ایک معاہدہ طے پا جاتا ہے تو امکان ظاہر کیا جا رہا ہے کہ اس کے عمل درآمد کے لیے کچھ وقت درکار ہو گا۔

جبکہ اس بات کی بھی تصدیق ہو چکی ہے کہ میگھن مارکل کینیڈا روانہ ہو چکی ہیں۔

دستبرداری کا اعلان

برطانوی شاہی خاندان کے شہزادہ ہیری اور ڈچز آف سسیکس میگھن نے اعلان کیا تھا کہ وہ شاہی حیثیت سے دستبردار ہو رہے ہیں اور مالی طور پر خودمختار ہونے کے لیے اقدامات کریں گے۔

ایک بیان میں برطانوی شہزادہ ہیری اور میگھن نے یہ بھی کہا کہ وہ اپنا وقت برطانیہ اور شمالی امریکہ کے درمیان گزارنے کا ارادہ رکھتے ہیں۔

بی بی سی کو معلوم ہوا تھا کہ اس بیان سے پہلے ملکہ برطانیہ یا شہزادہ ولیم سمیت کسی شاہی خاندان کے فرد سے مشورہ نہیں کیا گیا تھا اور بکنگھم پیلس اس سے ’مایوس‘ ہے۔

یہ بھی اطلاعات ہیں کہ شاہی خاندان کے سینیئر ارکان کو اس اعلان سے ’دکھ‘ پہنچا ہے۔ گذشتہ اکتوبر میں ڈیوک اینڈ ڈچز آف سسیکس نے میڈیا کی زد میں رہنے کے باعث پیدا ہونے والی مشکلات کا ذکر کیا تھا۔

کرسمس کے دوران بھی شاہی جوڑے نے اپنے شاہی فرائض سے چھ ہفتوں کا وقفہ لیا تھا اور کینیڈا میں اپنے بیٹے شہزادہ آرچی کے ساتھ کچھ وقت گزارا تھا۔ شہزادہ آرچی گذشتہ برس مئی میں پیدا ہوئے تھے۔

تجزیہ

جانی ڈائمنڈ، شاہی نامہ نگار

ممکن ہے کہ پیر کے روز ہونے والی نشست مسائل کو حل کرنے کے حوالے سے ہونے والی ضروری ملاقاتوں کے سلسلے کی آخری ملاقات نہ ہو۔

لیکن محل کے عملے اور سرکاری ملازمین نے اس حوالے سے کافی پیشرفت کی ہے تاکہ شاہی خاندان کے سب سے سینیئر افراد مل بیٹھیں اور شہزادہ ہیری اور میگھن کے مستقبل کے حوالے سے چند ٹھوس تجاویز پر تبادلہ خیال کر سکیں۔

ابھی بھی بہت سی رکاوٹیں ہیں۔ یہ بالکل واضح نہیں ہے کہ شہزادہ ہیری اور میگھن شاہی فرائض کی انجام دہی میں اپنا کتنا کردار دیکھتے ہیں۔

ملاقات میں شاہی محل اور شہزادہ ہیری اور میگھن کی نئی تنظیم کے مابین مالی اعانت اور رابطے جیسے امور بھی زیر بحث آ سکتے ہیں۔

موجودہ تعلقات پیچیدگیوں کا شکار ہیں مگر ایک نیا تعلق بنانا، جو کہ قائم رہ سکے، اس سے بھی زیادہ مشکل ہو گا۔

یہ کام (نیا تعلق) کرنے کی شدید خواہش ہے۔ لیکن یکساں طور پر یہ معاہدہ مضبوط اور قابل عمل ہونا چاہیے۔

یہاں مثال قائم کی جا رہی ہے- ایسا کرنے کا ایک طریقہ جو شاید آنے والے برسوں میں شاہی خاندان کے دیگر افراد بھی اپنائیں

جوڑے کے مومی مجسمے شاہی انکلوژر سے منتقل

اس سے قبل برطانیہ کے شاہی جوڑے، شہزادہ ہیری اور شہزادی میگھن مارکل کے مومی مجسموں کو لندن کے مومی مجسموں کے میوزیم مادام تساڈ کے شاہی انکلوژر سے منتقل کر دیا گیا تھا۔

منتقلی سے قبل ڈیوک اور ڈچز آف سسیکس کے مجسموں کو ملکہ برطانیہ اور ڈیوک آف ایڈنبرا، اور شہزادہ ولیم اور شہزادی کیٹ مڈلٹن کے مجسموں کے ساتھ شاہی انکلوژر میں رکھا گیا تھا۔ تاہم میوزیم کی جانب سے اب تک یہ واضح نہیں کیا گیا کہ ان مجسموں کو کہاں رکھا جائے گا۔

میوزیم کے مطابق یہ فیصلہ شاہی جوڑے کے حالیہ بیان کے بعد سامنے آیا ہے جس میں انھوں نے سینیئر شاہی حیثیت سے ’دستبردار‘ ہونے کا اعلان کیا تھا۔

میوزیم کے جنرل مینجر سٹیو ڈیویز نے بتایا کہ میگھن اور ہیری کی جوڑی کے مجسموں کا شمار ان کے میوزیم میں سب سے مقبول مجسموں میں سے ہے۔

ان کا کہنا تھا کہ ’بقیہ دنیا کی طرح ہم بھی ڈیوک اور ڈچز آف سسیکس کی سینیئر شاہی حیثیت سے دستربدار ہونے کے فیصلے پر ردِ عمل دے رہے ہیں۔

’آج کے بعد سے میگھن اور ہیری کے مجسمے شاہی خاندان کے مجسموں کے ساتھ نظر نہیں آئیں گے۔‘

مادام تساڈ کے ٹوئٹر اکاؤنٹ سے ایک تصویر جاری کی گئی جس میں دیکھا جا سکتا ہے کہ شہزادہ اور شہزادی کے مجسمے شاہی انکلوژر میں موجود نہیں ہیں۔

اس ٹویٹ کا عنوان تھا کہ ’ہمیں ان کی خواہشات کا احترام کرنا ہے۔‘

ڈیویز کا کہنا تھا کہ یہ مجسمے مادام تساڈ میوزیم کا ایک اہم حصہ رہیں گے، ’دیکھتے ہیں آگے اور کیا ان کا منتظر ہے۔‘

یاد رہے کہ بدھ کے روز ڈیوک اور ڈچز نے اعلان کیا ہے کہ وہ برطانیہ اور شمالی امریکہ کے درمیان اپنا وقت تقسیم کرنا چاہتے ہیں۔