عبدالرشید شکور بی بی سی اردو ڈاٹ کام، کراچی

	آئی سی ایل سے نیا معاہدہ نہیں کیا پرانے معاہدے ہی پر بھارت جاکر کرکٹ کھیلی۔

محمد یوسف نے ہفتے کو کراچی پریس کلب کے پروگرام ’میٹ دی پریس‘ میں کہا کہ آئی سی ایل سے ان کا تین سالہ معاہدہ ہے جسے وہ نہیں توڑ سکتے۔

واضح رہے کہ پاکستان کرکٹ بورڈ کے چئرمین اعجاز بٹ نے انہیں پیشکش کی ہے کہ اگر وہ آئی سی ایل چھوڑدیتے ہیں تو انہیں پاکستانی ٹیم میں شامل کیا جاسکتا ہے۔

محمد یوسف نے کہا کہ آئی سی ایل کھیلنا ان کا جرم نہیں۔ انہوں نے میچ فکسنگ کی نہ ہی سٹے بازی کی ہے۔ وہ اب بھی پاکستان سے کھیلنا چاہتے ہیں اور صدر آصف زرداری سے اپیل کرتے ہیں کہ انہیں انصاف دلائیں۔

انہوں نے اپنی بات کو دہراتے ہوئے کہا کہ آئی سی ایل کرکٹرز پر پابندی آئی سی سی نے عائد نہیں کی جب کہ پاکستان کرکٹ بورڈ یہ تاثر دیتا آیا ہے۔

انہوں نے کہا کہ وہ خود آئی سی سی کے خلاف عدالت میں نہیں جاسکتے لیکن یہ پاکستان کرکٹ بورڈ کی ذمہ داری ہے کہ وہ اس معاملے پر آئی سی سی سے بات کرے۔

انہوں نے کہا کہ اس پابندی کا نقصان پاکستانی کرکٹ کو پہنچا ہے۔

محمد یوسف نے پاکستان کرکٹ بورڈ کے وکیل شان گل کے اس الزام کو بے بنیاد قرار دیا کہ انہوں نے آئی سی ایل چھوڑ کر پاکستان کے لیے کھیلنے کے عوض ڈاکٹر نسیم اشرف سے مبینہ طور پر ایک کروڑ روپے لیے تھے۔

پاکستان کو بھی میری ضرورت ہے  اب بھی تین سال انٹرنیشنل کرکٹ کھیل سکتا ہوں اور پاکستانی ٹیم کو بھی میری ضرورت ہے محمد یوسف

محمد یوسف نے کہا کہ انہوں نے آئی سی ایل سے نیا معاہدہ نہیں کیا بلکہ پرانے معاہدے ہی پر انہوں نے بھارت جاکر کرکٹ کھیلی۔

انہوں نے کہا کہ وہ اب بھی تین سال انٹرنیشنل کرکٹ کھیل سکتے ہیں اور پاکستانی ٹیم کو بھی ان کی ضرورت ہے۔