عبدالرشید شکور بی بی سی اردو ڈاٹ کام، کراچی

	سلیکشن کمیٹی نے کپتان شعیب ملک اور نئے کوچ انتخاب عالم کی مشاورت سے ٹیم کا فیصلہ کیا

مڈل آرڈر بیٹسمین محمد یوسف جو ویزا نہ ملنے کے سبب ٹورنٹو کا ٹوئنٹی ٹوئنٹی ٹورنامنٹ نہیں کھیل سکے تھے ٹیم میں شامل کر لیےگئے ہیں۔

آف اسپنر سعید اجمل کی بھی واپسی ہوئی ہے۔ وہ کینیڈا کے ٹورنامنٹ کے لیے اعلان کردہ ٹیم میں شامل تھے لیکن سابق چیف آپریٹنگ آفیسر شفقت نغمی کے کہنے پر وزارت کھیل نے انہیں ڈراپ کر کے شعیب خان کو آخری لمحات میں ٹیم میں شامل کر لیا تھا۔

ٹوئنٹی ٹوئنٹی ٹورنامنٹ کی ٹیم میں شامل شعیب خان اور انور علی ڈراپ کر دیے گئے ہیں۔ فاسٹ بولر شعیب اختر پنٹنگولر لیگ کے آخری میچ میں عمدہ بولنگ سے سلیکٹروں کو متاثر کرنے میں کامیاب ہوگئے ہیں اسی طرح پنٹنگولر لیگ میں شاندار آل راؤنڈ کارکردگی نے شاہد آفریدی کو حتمی سکواڈ میں جگہ دلوا دی ہے۔

سلیم جعفر، اعجاز احمد اور شعیب محمد پر مشتمل سلیکشن کمیٹی نے کپتان شعیب ملک اور نئے کوچ انتخاب عالم کی مشاورت سے جس ٹیم کو حتمی شکل دی ہے وہ ان کھلاڑیوں پر مشتمل ہے۔ شعیب ملک( کپتان)، مصباح الحق( نائب کپتان)، سلمان بٹ، ناصرجمشید، یونس خان، محمد یوسف، شاہد آفریدی، کامران اکمل، سہیل تنویر، شعیب اختر، عمرگل، راؤ افتخار، فواد عالم، عبدالرؤف اور سعید اجمل۔