مناء رانا بی بی سی اردو ڈاٹ کام، لاہور

	شعیب اختر کو ستر لاکھ جرمانہ ادا کیے بغیر ہی ٹیم میں شامل کر لیا گیا ہے

مڈل آڈر بیٹس مین محمد یوسف کا نام ٹیم میں شامل نہیں جبکہ فاسٹ بالر شعیب اختر ٹیم میں جگہ حاصل کرنے میں کامیاب ہوگئے۔

کینیڈا کے سفارت خانے نے محمد یوسف کو ویزہ جاری نہیں کیا اور اسی لیے وہ ٹیم میں جگہ حاصل نہیں کر سکے۔

پاکستان کرکٹ بورڈ کے میڈیا ڈاریکٹر منصور سہیل کے مطابق کینیڈا کے سفارت خانے نے محمد یوسف کو ویزہ دینے سے انکار نہیں کیا بلکہ انہوں نے ان کے ویزے کی درخواست پر غور کرنے کے لیے وقت مانگا ہے اور چونکہ پاکستان کرکٹ ٹیم نے چار ملکی ٹورنامنٹ کے لیے بدھ اور جمعرات کی درمیانی شب روانہ ہونا ہے اس لیے ٹیم کے اعلان کے لیےمزید انتظار ممکن نہیں تھا۔
منصور سہیل کے مطانق چونکہ کینیڈا کے سفارت خانے نے ابھی تک محمد یوسف کو ویزہ دینے سے انکار نہیں کیا اس لیے ہم ان سے انکار کی وجہ نہیں پوچھ سکتے۔

پاکستان کی ٹیم کے اعلان میں تاخیر کی ایک وجہ تو یہی تھی جبکہ منصور سہیل کے مطابق سلیکشن کمیٹی لاہور میں جاری قومی ٹونٹی ٹونٹی کرکٹ ٹورنامنٹ کے مزید میچز دیکھ کر ٹیم کا انتخاب کرنا چاہتی تھی۔

فاسٹ بالر شعیب اختر جن کے بارے میں پہلے پاکستان کرکٹ بورڈ کا کہنا تھا کہ ان کی ٹیم میں شمولیت عدالت کے فیصلے کے ساتھ مشروط ہے۔ لیکن اب انہیں ستر لاکھ کا جرمانہ ادا کیے بغیر ہی ٹیم میں شامل کر لیا گیا ہے۔

شعیب اختر کے ضمن میں یہ پاکستان کرکٹ بورڈ کے مؤقف میں یو ٹرن آیا ہے۔
پاکستان کرکٹ بورڈ کے میڈیا ڈائریکٹر کے مطابق شعیب اختر کے سلسلے میں ہمیشہ عدالتی فیصلے کا احترام کیا گیا ہے جبکہ پی سی بی کے وکیل تفضل حسین رضوی نے بارہا کہا کہ عدالت نے صرف شعیب اختر کی کھیلنے کی پابندی کو عارضی طور پر ختم کیا ہے جبکہ جرمانہ انہیں ادا کرنا ہو گا تب ہی وہ کھیل سکیں گے۔

پی سی بی نے عدالت میں ایک درخواست بھی دی ہے کہ عدالت عالیہ ان کی رہنمائی کرے کہ جرمانہ ادا نہ کرنے کی صورت میں شعیب اختر کو ٹیم میں شامل کرنا چاہیے۔

شعیب اختر کے کیس کی سماعت بدھ آٹھ اکتوبر کو ہو رہی ہے جبکہ اس سے پہلے ہی شعیب اختر کو ٹیم میں جگہ مل گئی۔

اوپننگ بیٹس مین ناصر جمشید ٹیم میں شامل نہیں ان کی جگہ نوجوان اوپنر کوئٹہ سے تعلق رکھنے والے شعیب خان کو شامل کیا گیا ہے۔ شعیب خان نے جاری ٹونٹی ٹونٹی کرکٹ ٹورنامنٹ میں اچھی کارکردگی کا مظاہرہ کیا ہے۔
چار ملکی ٹورنامنٹ میں شرکت کے لیے ٹیم بدھ کو پاکستانی وقت کے مطابق رات ساڑھے دس بجے روانہ ہو گی۔

ٹیم: شعیب ملک(کپتان)، مصباح الحق، سلمان بٹ، یونس خان، شاہد آفریدی، کامران اکمل، سہیل تنویر، شعیب اختر، عمر گل، فواد عالم، سہیل خان، خالد لطیف، عبدالرؤف، شعیب خان اور انور علی۔