عبدالرشید شکور بی بی سی اردو ڈاٹ کام کراچی

	انتخاب عالم پاکستان کرکٹ ٹیم کے کوچ بھی رہ چکے ہیں

پاکستان کرکٹ بورڈ کے چیئرمین اعجاز بٹ نے بی بی سی سے بات کرتے ہوئے کہا کہ انتخاب عالم کو پہلے مرحلے میں ابوظہبی میں ویسٹ انڈیز کے خلاف ون ڈے سیریز کے لئے پاکستانی ٹیم کا کوچ بنایا گیا ہے تاہم انہوں نے تجویز دی ہے کہ انہیں طویل مدت کے لئے یہ ذمہ داری سونپی جائے۔

اعجاز بٹ نے کہا کہ گورننگ بورڈ کے اجلاس میں انتخاب عالم کو دوسال کے لئے کوچ بنائے جانے کی باضابطہ منظوری دے دی جائے گی۔

واضح رہے کہ پاکستان کرکٹ بورڈ نے جمعہ کو جیف لاسن کو پاکستانی کرکٹ ٹیم کے عہدے سے برطرف کردیا تھا۔

66 سالہ انتخاب عالم ورلڈ کپ جیتنے والی پاکستانی کرکٹ ٹیم کے منیجر تھے۔وہ متعدد مرتبہ ٹیم کے منیجر اور کوچ کی ذمہ داری نبھاچکے ہیں۔

پاکستانی کرکٹ ٹیم کے نئے کوچ انتخاب عالم نے پاکستانی کرکٹ ٹیم میں ڈسپلن اور فٹنس کو اپنی اولین ترجیح قرار دیا ہے۔

انتخاب عالم نے بی بی سی سے بات کرتے ہوئے کہا کہ منیجرشپ اور کوچنگ ان کے لئے ہمیشہ سے چیلنج رہی ہے اور اس مرتبہ بھی انہوں نے بہت سوچ سمجھ کر یہ ذمہ داری قبول کی ہے۔

انہوں نے کہا کہ کھلاڑیوں کی فٹنس، ڈسپلن، دنیا میں پاکستانی کرکٹ کا امیج اور ٹیم میں صحیح کامبی نیشن پر کام کرنے کی ضرورت ہے۔

پاکستانی کرکٹ ٹیم کے ساتھ تین غیرملکی کوچز کے ناکام تجربے کے بارے میں انتخاب عالم کا کہنا ہے کہ اس کی بنیادی وجہ زبان کا مسئلہ ہے۔ باہر سے آنے والے کوچ کے لئے پاکستانی معاشرے میں خود کو ڈھالنا آسان نہیں۔

انتخاب عالم نے کہا کہ کوچ کا اصل کام ٹیم کو یکجا کرتے ہوئے ہر کھلاڑی کی صلاحیت سے فائدہ اٹھانا ہے۔

انہوں نے کہا کہ ٹیکنالوجی نے کوچ کا کام آسان کیا ہے لیکن یہ کوچ کا کام ہے کہ وہ لیپ ٹاپ یا وڈیوز سے حریف ٹیم اور کھلاڑیوں کی خوبی اور خامی کو اپنے کھلاڑیوں کو کتنے موثر طریقے سے سمجھاتا ہے۔

انتخاب عالم نے آخری مرتبہ2000ء میں کوچ کا عہدہ پاکستان کرکٹ بورڈ کے اسوقت کے ارباب اختیار کے رویے سے دلبرداشتہ ہوکر چھوڑا تھا اور کہا تھا کہ دوبارہ ذمہ داری دیئے جانے پر وہ ایک سے زائد بار سوچیں گے۔

اس بارے میں ان کا کہنا ہے کہ چیئرمین اعجاز بٹ ان کے ہم عصر کھلاڑی ہیں اور دونوں ایک دوسرے کے لئے احترام رکھتے ہیں لہذا انہوں نے یہ ذمہ داری قبول کی ہے۔