انتخاب عالم پنجاب کی ٹیم کی کوچنگ کرنے پر انتہائی خوش ہیں

پنجاب کرکٹ ایسوسی ایشن کے اس فیصلے کے بعد بھارت کی حکومت نے گزشتہ تریپن سالوں میں پہلی مرتبہ کسی پاکستانی کوغیر معینہ مدت کا ویزا دے دیا ہے۔

یہ پہلا موقع ہو گا کہ کوئی پاکستانی بھارت کی کسی ٹیم کی ’کوچنگ‘ کی خدمات انجام دے گا۔

پنجاب کرکٹ ایسوسی ایشین کے صدر اندرجیت سنگھ نے موہالی میں انتخاب عالم کا استقبال کرتے ہوئے کہا کہ ان کو پنجابی کھلاڑیوں کی تریبت کے لیے اس وجہ سے چنا گیا ہے کہ وہ ان کھلاڑیوں سے ان کی زبان میں بات کرنے کی صلاحیت رکھتے ہیں۔

انتخاب عالم بھارت کی ریاست پنجاب کے شہر ہوشیار پور میں پیدا ہوئے تھے۔ انہوں نے کہا کہ پنجابی ہونے کے ناطے انہیں پنجابی کھلاڑیوں کی تربیت میں کوئی مشکل پیش نہیں آئے گی۔

پنجابی کھلاڑیوں کی کوچنگ کرنے کا موقع ملنے پر انتخاب عالم انتہائی خوش نظر آ رہے تھے ۔ انہوں نے کہا کہ ان کی پہلی ترجیح یہ ہو گی کہ وہ ہر کھلاڑیوں کو فرداً فرواً جان جائیں اور پھر ان کی انفرادی ضروریات کو پورا کرنے کی کوشش کریں۔

پنجاب کرکٹ ایسوسی ایشن کے فیصلہ کو سراہتے ہوئے انہوں نے کہا کہ بھارت اور پاکستان میں بہت کرکٹ ٹیلنٹ موجود جس کو ڈھونڈا جانا چاہیے۔

انہوں نے کہا کہ بھارت اور پاکستان میں اس طرح کے کرکٹ روابط بین الاقوامی کرکٹ کے لیے بھی انتہائی مفید ثابت ہوں گے۔

انہوں نے کہا کہ موہالی میرے شہر لاہور کی طرح ہے اور ایک لمحے کے لیے بھی مجھے یہ محسوس نہیں ہوا کہ میں کسی غیر ملک میں ہوں۔