عبدالرشید شکور بی بی سی اردو ڈاٹ کام کراچی

	کرکٹر یاسر عرفات

وفاقی وزیر کھیل پیر آفتاب شاہ جیلانی نے بی بی سی کو بتایا کہ پاکستان کرکٹ بورڈ نے پاکستانی کرکٹرز کی آئی پی ایل میں شرکت کے بارے میں استفسار کیا تھا اور اس ضمن میں ایوان صدر نے بھی وزارت کھیل سے اس معاملے میں رائے معلوم کی تھی۔

انہوں نے بتایا کہ کھیلوں کی وزارت کو پاکستانی کرکٹرز کی آئی پی ایل میں شرکت پر کوئی اعتراض نہیں ہے کیونکہ یہ کرکٹرز اپنی انفرادی حیثیت میں اس لیگ میں حصہ لیں گے۔

پیر آفتاب شاہ جیلانی نے کہا کہ صدر مملکت کو جو پاکستان کرکٹ بورڈ کے پیٹرن انچیف بھی ہیں اس سلسلے میں آگاہ کردیا گیا ہے۔

آئی پی ایل کے دوسرے ٹورنامنٹ کے لئے کرکٹرز کی نیلامی چھ فروری کو گوا میں ہونے والی ہے جس میں پاکستانی کرکٹرز یاسرعرفات، دانش کنیریا، محمد حفیظ اور عاصم کمال کے نام بھی شامل ہیں۔

انہوں نے کہا کہ پاکستانی ہاکی ٹیم کو بھارت جانے کی اجازت نہ دینا مختلف معاملہ تھا کیونکہ وہ ٹیم پاکستان کی نمائندگی کر رہی تھی۔

واضح رہے کہ ممبئی دہشت گرد حملوں کے بعد پاکستانی کرکٹرز کی آئی پی ایل میں شرکت کے بارے میں قیاس آرائیاں جاری تھیں۔ حکومت پاکستان نے ہاکی اور اسکواش ٹیموں کو بھارت جانے کی اجازت نہیں دی تھی۔

واضح رہے کہ انڈین پریمیئر لیگ کے پہلے ٹورنامنٹ میں پاکستانی کرکٹرز شعیب ملک، شعیب اختر، شاہد آفریدی، سہیل تنویر، کامران اکمل، مصباح الحق، یونس خان، محمد حفیظ اور محمد آصف نے حصہ لیا تھا۔

آئی پی ایل کے دوسرے ٹورنامنٹ کے لئے کرکٹرز کی نیلامی چھ فروری کو گوا میں ہونے والی ہے جس میں پاکستانی کرکٹرز یاسرعرفات، دانش کنیریا، محمد حفیظ اور عاصم کمال کے نام بھی شامل ہیں۔