عبدالرشید شکور بی بی سی اردو ڈاٹ کام، کراچی

	شعیب خود بھی غیرمعمولی کارکردگی کا مظاہرہ بھی نہ کر سکے:انضمام

انضمام الحق نے بی بی سی سے بات کرتے ہوئے کہا کہ شعیب ملک سے کھلاڑیوں کو کافی شکایت رہی اور وہ خود غیرمعمولی کارکردگی کا مظاہرہ بھی نہ کر سکے کہ دوسروں کے لیے مثال قائم کر سکتے۔

انضمام کے مطابق ’شعیب ملک کے ساتھ مسئلہ یہ رہا کہ ٹیم کے کئی دوسرے کھلاڑی ان سے زیادہ شاندار پرفارمنس دیتے رہے جس سے ان پر دباؤ رہا جبکہ خود ان کی طرف سے کوئی قابل ذکر کارکردگی سامنے نہیں آئی‘۔

انہوں نے توقع ظاہر کی کہ یونس خان طویل عرصے تک قیادت کی ذمہ داری نبھائیں گے کیونکہ کپتان کی بار بار تبدیلی ٹیم کے لیے نقصان دہ ہے۔ انضمام الحق نے کہا کہ یونس خان تجربہ کار کرکٹر ہیں اور انہیں قیادت کرنی آتی ہے۔

انضمام کے مطابق’وہ نہ صرف ٹیم کے نائب کپتان رہے ہیں بلکہ متعدد مواقعوں پر انہوں نے قیادت کی ذمہ داری بھی نبھائی ہے اور انہیں ٹیم ہینڈل کرنے میں کوئی مشکل نہیں ہوگی‘۔ انضمام الحق نے کہا کہ کپتان باقی ٹیم کے لیے قابلِ تقلید ہوتا ہے اور یونس خان کی ایک خوبی یہ بھی ہے وہ خود عمدہ کارکردگی کا مظاہرہ بھی کرتے آرہے ہیں۔

انضمام الحق نے کہا کہ کپتانی سے ہٹنے کے بعد شعیب ملک کے لیے ٹیم میں آسانی سے جگہ برقرار رکھنا آسان نہیں ہوگا۔’اگر انہیں ٹیم میں جگہ برقرار رکھنی ہے تو انہیں غیر معمولی کارکردگی دکھانی ہوگی اس کے علاوہ نئے کپتان پر بھی منحصر ہوگا کہ وہ کس کمبینیشن کے ساتھ میدان میں اترتے ہیں‘۔