عبدالرشید شکور بی بی سی اردو ڈاٹ کام، کراچی

	’فیڈریشن کے پاس ہاکی کی ترقی کے لیے تین کروڑ سینتیس لاکھ روپے دستیاب ہیں‘

بھارتی جونیئر ہاکی ٹیم پیر کو واہگہ کے راستے لاہور پہنچنے والی تھی جب کہ پاکستان کی جونیئر ہاکی ٹیم کے خلاف پانچ ٹیسٹ میچوں کی سیریز کا پہلا میچ منگل کو کراچی میں ہونا تھا۔

پاکستان ہاکی فیڈریشن کے صدر قاسم ضیاء نے ہاکی کلب آف پاکستان سٹیڈیم میں پریس کانفرنس میں بتایا کہ بھارت میں پاکستانی سفاتخانے نے بھارتی ٹیم کو جمعہ کو ویزے جاری کر دیےتھے لیکن اتوار کو بھارتی ہاکی فیڈریشن نے پاکستان ہاکی فیڈریشن کو مطلع کیا کہ ان کے فارن آفس نے بھارتی جونیئر ٹیم کو دورے سے روک دیا ہے جس کا سبب سکیورٹی خدشات ہیں۔

قاسم ضیاء نے کہا کہ اس صورتحال پر انہوں نے وزیراعظم یوسف رضا گیلانی سے بات کی جس پر انہوں نے سیکرٹری خارجہ کو ہدایت کی کہ وہ اپنے بھارتی ہم منصب سے بات کریں۔

بھارتی سکریٹری خارجہ نے یقین دلایا کہ ٹیم نہ بھیجنے کے فیصلے پر نظرثانی کی جائے گی لیکن پیر کو اچانک یہ بتادیا گیا کہ بھارتی ٹیم پاکستان نہیں آرہی ہے۔
حالانکہ بھارتی ٹیم اتوار سے امرتسر میں سرحد پار کرنے کی منتظر بیٹھی تھی۔

قاسم ضیا نے کہا کہ پاکستان نے بھارتی جونیئر ٹیم کے لیے سکیورٹی کی ہرممکن یقین دہانی کرائی تھی۔انہوں نے کہا کہ بھارت کا فیصلہ افسوسناک اور مایوس کن ہے جس کےبعد وہ بھی یہ سوچیں گے کہ پاکستانی ٹیم بھارت جانے سے قبل اپنی حکومت سے پوچھے۔