مناء رانا بی بی سی اردو ڈاٹ کام، لاہور

	جونیئر ہاکی ٹیم بھارت کے ساتھ پاکستان میں سیریز کھیلنے والی ہے

یہ ٹیم گیارہ نومبر سے پاکستان کے مختلف شہروں میں بھارت کی جونیئر ہاکی ٹیم کے خلاف پانچ میچز کی سیریز کھیلے گی۔ ٹیم کے کپتان فارورڈ شفقت رسول ہیں۔

اس سیریز کا پہلا میچ گیارہ نومبر کو کراچی میں فلڈ لایٹس میں کھیلا جائے گا۔ دوسرا میچ راولپنڈی میں تیرہ نومبرکو، تیسرا میچ پندرہ نومبر کو فیصل آباد میں، چوتھا میچ اٹھارہ نومبر کو سیالکوٹ میں اور پانچواں اور آخری میچ اکیس نومبر کو لاہور میں ہوگا۔

عام طور پر پندرہ رکنی ٹیم تشکیل دی جاتی ہے لیکن جونیئر ٹیم کے چیف کوچ قمر ابراہیم نے سلیکشن کمیٹی سے درخواست کی تھی کہ انہیں زیادہ کھلاڑی دیے جائیں تاکہ وہ اس سیریز میں مختلف کمبینیشن آزما سکیں اور کھلاڑیوں کی صلاحیت کا جائزہ لے سکیں۔

پاک بھارت جونیئر ہاکی سیریز کا انعقاد اگلے سال ہونے والے ہاکی کے جونیئر عالمی کپ کی تیاریوں کے سلسلے میں کیا جا رہا ہے۔

ٹیم کے اعلان کے موقع پر پاکستان ہاکی فیڈریشن کے صدر سابق اولمپئن قاسم ضیاء نے بھی ذرائع ابلاغ سے بات کی۔ ان کا کہنا تھا کہ اگلے سال پاکستان ہاکی فیڈریشن کا بجٹ 37 کروڑ اور پچاس لاکھ روپے کا ہوگا جس میں سے 25 کروڑ روپے وفاقی حکومت دے رہی ہے۔

انہوں نے کہا کہ وزیر اعظم پاکستان نے ان کی درخواست پر ان چار اداروں کو حکم نامہ جاری کر دیا ہے جنہوں نے کچھ عرصہ پہلے اپنے سپورٹس ڈپارٹمنٹ بند کر دیے تھے اور ہاکی کی ٹیمیں ختم کر دیں تھیں۔

ان اداروں میں الائیڈ بینک، یونائٹیڈ بینک، مسلم کمرشل بینک اور پاکستان کسٹم کے ادارے شامل تھے۔ قاسم ضیاء کے مطابق ان اداروں میں دوبارہ ٹیمیں بننے سے کھلاڑیوں کو نوکریاں ملیں گی اور ان کا مستقبل محفوظ ہوگا۔

قاسم ضیاء کا کہنا تھا کہ سینیئر ٹیم کے لیے منیجر، چیف کوچ اور اسسٹنٹ کوچ کا اعلان پندرہ نومبر تک کر دیا جائے گا۔ قاسم ضیاء نے ایک بار پھر دہرایا کہ ان کا ہدف 2010 کے ایشین گیمز اور 2012 کے اولمپک گیمز کے لیے ٹیم کو وکٹری سٹینڈ تک پہنچانا ہے۔

جونیئر ہاکی ٹیم
عمران شاہ، وقاص احمد، کاشف علی، محمد عتیق، عمران عباس، محمد عمران، ظہیر احمد، عامر شہزاد، فرید، محمد ارشد، عدیل حسین، شفقت رسول، حسیم خان، محمد زبیر، رضوان، محمد توفیق، یاسر، حسن اختر، ازلان خان اور شہباز۔