عبدالرشید شکور بی بی سی اردو ڈاٹ کام، کراچی

	ویسٹ انڈین کرکٹ بورڈ نے ٹیسٹ سیریز نہ ہونے کا سبب وقت کی کمی کو قرار دیا ہے

پاکستان کرکٹ بورڈ کے ڈائریکٹر جنرل سلیم الطاف نے بی بی سی سے بات کرتے ہوئے کہا کہ ویسٹ انڈین کرکٹ بورڈ نے ٹیسٹ سیریز نہ ہونے کا سبب وقت کی کمی کو قرار دیا ہے۔ اس کا کہنا ہے کہ ابو ظہبی میں پاکستان سے تین ون ڈے کھیلنے کے بعد ویسٹ انڈین ٹیم کو نیوزی لینڈ کے دورے پر جانا ہے لہذا فوری طور پر دو ٹیسٹ کی یہ سیریز کھیلنا ممکن نہیں۔

سلیم الطاف نے کہا کہ ایک دوسری ای میل کے ذریعے ویسٹ انڈین کرکٹ بورڈ نے یہ بھی کہا ہے کہ دسمبر میں آئی سی سی کے اجلاس کے موقع پر پاکستان کرکٹ بورڈ سے بات چیت کے ذریعے اس بات کو ممکن بنایا جاسکتا ہے کہ فیوچر ٹور پروگرام سے ہٹ کر دونوں ٹیسٹ سیریز کھیل سکیں۔

سلیم الطاف نے کہا کہ پاکستان میں کھیلنے سے غیرملکی ٹیموں کے انکار کے بعد متبادل پروگرام کے تحت’ آف شور‘ سینٹرز پر پاکستانی ٹیم کے میچز پر غور کیا جا رہا ہے۔ انہوں نے کہا کہ انگلینڈ نے بھی اگست ستمبر میں اپنے یہاں پاکستان کے لیے ٹیسٹ میچز کی میزبانی کی پیشکش کر رکھی ہے۔

دلچسپ بات یہ ہے کہ ویسٹ انڈیز سے مجوزہ ٹیسٹ سیریز کی پیشکش بھی ویسٹ انڈیز ہی نے کی تھی لیکن اس نے اس کے لیے پاکستان کرکٹ بورڈ سے دس لاکھ ڈالرز کا مطالبہ کیا تھا۔

پاکستان کرکٹ بورڈ نے دو ٹیسٹ میچوں کے لیے چار لاکھ ڈالرز کی پیشکش کی تھی جس پر ویسٹ انڈین کرکٹ بورڈ راضی نہیں ہوا۔

ویسٹ انڈیز کے انکار کے بعد اب یہ بات طے ہوگئی ہے کہ اس سال پاکستانی ٹیم کوئی بھی ٹیسٹ میچ نہیں کھیلے گی۔

1970ء کے بعد یہ پہلا موقع ہے کہ کوئی سال پاکستان کے لیے ٹیسٹ کرکٹ سے خالی گیا ہے۔