عبدالرشید شکور بی بی سی اردو ڈاٹ کام، کراچی

	بی سی سی آئی نے ہمیشہ پاکستان کرکٹ بورڈ کا ساتھ دیا ہے

بھارتی کرکٹ بورڈ کے سکریٹری نرنجن شاہ نے بی بی سی سے بات کرتے ہوئے کہا کہ اس مرحلے پر کچھ کہنا قبل از وقت ہوگا۔ ابھی بھارتی ٹیم کے دورے میں کافی وقت ہے لیکن وہ یہ ضرور کہیں گے کہ بھارتی کرکٹ بورڈ حکومتی ایڈوائس پر عمل کرے گا۔

واضح رہے کہ بھارتی کرکٹ ٹیم کو آئندہ سال پاکستان کے دورے پر آنا ہے۔ اس دورے میں اسے ایک ٹیسٹ اور ایک ون ڈے انٹرنیشنل راولپنڈی میں کھیلنا ہے لیکن دارالحکومت اسلام آباد کے میریٹ ہوٹل میں ہونے والے خود کش بم دھماکے کے بعد راولپنڈی میں بین الاقوامی کرکٹ دوبارہ شروع ہونے پر سوالیہ نشان لگ گیا ہے۔

نرنجن شاہ نے کہا کہ بھارتی کرکٹ ٹیم کا ٹور پروگرام دو ماہ پہلے ہی طے پاچکا ہے جہاں تک اسلام آباد بم دھماکے پر بھارتی کرکٹ بورڈ کی تشویش کا تعلق ہے وہ اس بارے میں کوئی تبصرہ کرنا نہیں چاہتے۔جیسے ہی دورے کا وقت آئے گا بی سی سی آئی بھارتی حکومت سے رہنمائی لے گا اس سلسلے میں اس کی رائے معلوم کی جائے گی اور اسی کی روشنی میں پاکستان کرکٹ بورڈ سے بات کی جائے گی۔

کچھ نہ کچھ ایڈجسٹمنٹ  آسٹریلیا کے ساتھ ہونے والے سات ون ڈے انٹرنیشنل کو قربان نہیں کیا جائے گا تاہم انہوں نے کہا کہ آئی سی سی سے اس بارے میں بات ہو رہی ہے اس سلسلے میں سب کو کچھ نہ کچھ ایڈجسٹمنٹ کرنی ہوگی نرنجن شاہ

بھارتی کرکٹ بورڈ کے سکریٹری نرنجن شاہ نے کہا کہ بی سی سی آئی نے ہمیشہ پاکستان کرکٹ بورڈ کا ساتھ دیا ہے۔ ایشیا کپ میں بھارتی ٹیم کھیلی اور جب کئی ممالک نے چیمپئنز ٹرافی کے سلسلے میں تشویش ظاہر کی تو اس وقت بھی بھارتی کرکٹ بورڈ نے پاکستان کرکٹ بورڈ کی حمایت کی۔

انہوں نے کہا کہ پاکستانی کرکٹ کو مشکل صورتحال سے نکالنے کے لیے مل بیٹھ کر مسئلے کا حل تلاش کرنا ہوگا لیکن جب معاملہ سکیورٹی کا آ جاتا ہے تو پھر حکومت کی ایڈوائس کے مطابق ہی کرکٹ بورڈ اپنا فیصلہ کرسکتاہے۔

آئی سی سی چیمپئنز ٹرافی کی تاریخوں میں ایڈجسٹمنٹ کے بارے میں سوال پر نرنجن شاہ نے واضح کردیا کہ اس ضمن میں آسٹریلیا کے ساتھ ہونے والے سات ون ڈے انٹرنیشنل کو قربان نہیں کیا جائے گا تاہم انہوں نے کہا کہ آئی سی سی سے اس بارے میں بات ہو رہی ہے اس سلسلے میں ہر ایک کو کچھ نہ کچھ ایڈجسٹمنٹ کرنی ہوگی۔