عبدالرشید شکور بی بی سی اردو ڈاٹ کام، کراچی

	ٹورنامنٹ دس سے تیرہ اکتوبر تک ٹورنٹو میں کھیلا جائے گا

یہ ٹورنامنٹ دس سے تیرہ اکتوبر تک ٹورنٹو میں کھیلا جائے گا جس میں پاکستان، سری لنکا، زمبابوے اور کینیڈا کی ٹیمیں حصہ لیں گی۔

ٹورنامنٹ کے آرگنائزر نعمان نبی نے بی بی سی کو بتایا کہ تمام معاملات طے پاچکے ہیں اور ٹائٹل سپانسرشپ پر بھی دستخط ہوچکے ہیں جس کا باقاعدہ اعلان جلد ہونے والا ہے۔

نعمان نبی نے کہا کہ جس گراؤنڈ پر یہ ٹورنامنٹ ہونے والا ہے وہ آئی سی سی سے منظور شدہ ہے۔ ’جہاں تک اس کی حالت پر اٹھائے گئے اعتراض کا تعلق ہے تو ویسٹ انڈیز نے یہ اعتراض جولائی میں کیا تھا لیکن گزشتہ ماہ ویسٹ انڈیز برمودا اور کینیڈا کی ٹیمیں اس گراؤنڈ پر کھیل چکی ہیں‘۔

ٹوئنٹی ٹوئنٹی ٹورنامنٹ کا پروگرام دس اکتوبر۔سری لنکا بمقابلہ زمبابوے۔ پاکستان بمقابلہ کینیڈا۔ گیارہ اکتوبر۔ زمبابوے بمقابلہ کینیڈا۔ پاکستان بمقابلہ سری لنکا۔ بارہ اکتوبر۔ سری لنکا بمقابلہ کینیڈا پاکستان بمقابلہ زمبابوے۔ تیرہ اکتوبر۔ فائنل اور تیسری پوزیشن کا میچ۔

انہوں نے کہا کہ اس گراؤنڈ کا انتظام رکھنے والوں سے ان کی میٹنگ ہوئی تھی اور وہ اسے دن رات بین الاقوامی معیار کے مطابق بنانے میں مصروف ہیں جہاں سے میچز براہ راست ٹیلی کاسٹ کیے جاسکیں ۔

نعمان نبی کا کہنا ہے کہ ٹورنامنٹ کی مجموعی انعامی رقم ایک لاکھ کینیڈین ڈالر ہے۔ فاتح ٹیم کو ساٹھ ہزار ڈالر کی انعامی رقم ملے گی۔ رنراپ ٹیم تیس ہزار ڈالرز کی حقدار ہوگی۔ باقی رقم مین آف دی میچ اور مین آف دی سیریز میں تقسیم ہوگی۔

انہوں نے کہا کہ نشریاتی حقوق کا فیصلہ بھی جلد ہوجائے گا۔ اس ضمن میں دو تین بڑے گروپس سے بات چیت ہورہی ہے۔