مناء رانا بی بی سی اردو ڈاٹ کام، لاہور

	جنوبی افریقہ کی اچھی پیشکش کا مثبت جواب دینا چاہیے: پی سی بی

پاکستان کرکٹ بورڈ کے چیف ایگزیکٹو شفقت نغمی نے بی بی سی سے بات کرتے ہوئے کہا کہ جنوبی افریقی کرکٹ بورڈ نے پاکستان کو دعوت دی ہے لیکن یہ دورہ اس وقت مکمل طور پر طے پائے گا جب جنوبی افریقہ کو اس کے لیے سپانسرشپ اور میڈیا پاٹنر مل جائے گا۔

انہوں نے کہا کہ جب تک یہ باتیں طے نہ پا جائیں اس وقت تک اس دورے کو یقینی نہیں کہا جا سکتا اور اس میں سات سے دس دن لگ سکتے ہیں۔
جنوبی افریقی کرکٹ بورڈ نے سب سے پہلے پاکستان میں چمپئنز ٹرافی کھیلنے سے باضابطہ انکار کیا تھا۔

’کھلانا اہم ہے‘  ہمارے نزدیک اپنی ٹیم کو کرکٹ کھلانا زیادہ اہم ہے اور اس سال پاکستان کی ٹیم کو بہت کم کرکٹ کھیلنے کے لیے ملی ہے اور اسی لیے اگر تمام معاملات طے پا جاتے ہیں تو یہ ٹیم کے لیے اچھا ہو گا۔ انہوں نے کہا کہ یہ دورہ رمضان کے مہینے میں ہی ہو گا شفقت نغمی

ان کا کہنا ہے کہ چند لوگوں نے یہ کہا کہ جنوبی افریقہ نے پاکستان آنے سے انکار کیا تو ہمیں بھی ایسا ہی کرنا چاہیے۔ شفقت نغمی کا کہنا تھا کہ ان کی رائے اس سلسلے میں مختلف ہے اور وہ یہ سمجھتے ہیں کہ یہ سوچ بچگانہ ہے، اور اگر جنوبی افریقہ کے کرکٹ بورڈ نے ایک اچھی پیشکش کی ہے تو ہمیں اس کا مثبت جواب دینا چاہیے۔

انہوں نے کہا کہ ہمارے نزدیک اپنی ٹیم کو کرکٹ کھلانا زیادہ اہم ہے اور اس سال پاکستان کی ٹیم کو بہت کم کرکٹ کھیلنے کے لیے ملی ہے اور اسی لیے اگر تمام معاملات طے پا جاتے ہیں تو یہ ٹیم کے لیے اچھا ہو گا۔ انہوں نے کہا کہ یہ دورہ رمضان کے مہینے میں ہی ہو گا۔

شفقت نغمی کا کہنا تھا کہ چمپئنز ٹرافی کے ملتوی ہونے سے پاکستان کرکٹ بورڈ کو کوئی مالی نقصان نہیں ہوا کیونکہ اس پر اب تک ہونے والے اخراجات آئی سی سی نے ہی اٹھائے اور جہاں تک ہماری میزبانی کی فیس وہ ہمیں اس مالی سال میں نہیں تو اگلے مالی سال میں مل جائے گی۔ شفقت نغمی کا کہنا تھا کہ پی سی بی کے مالی حالات اتنے برے نہیں ہیں کہ وہ ایک فیس نہ ملنے پر اپنے اخراجات پورے نہ کر سکے۔