ٹورنامنٹ بارہ ستمبر سے اٹھائیس ستمبر تک منعقد ہونا تھا۔

ٹورنامنٹ ملتوی کرنے کا فیصلہ دبئی میں بین الاقوامی کرکٹ کونسل کے اجلاس میں کیا گیا۔

چیمپئنز ٹرافی کرکٹ ٹورنامنٹ بارہ ستمبر سے اٹھائیس ستمبر تک منعقد ہونا تھا۔ تاہم پاکستان کی سکیورٹی صورتحال کو بنیاد بنا کر جنوبی افریقہ نے اس ٹورنامنٹ کے لیے ٹیم بھیجنے سے نکار کر دیا تھا۔اس کے علاوہ آسٹریلیا، نیوزی لینڈ اور انگلینڈ کی جانب سے بھی موجودہ صورتحال میں پاکستان میں ٹورنامنٹ کے انعقاد پر تحفظات ظاہر کیے گئے تھے۔

آئی سی سی کے صدر ڈیوڈ مورگن کے مطابق بین الاقوامی کرکٹ کونسل کو پاکستان کرکٹ بورڈ سے ’ہمدردی ہے‘ اور وہ پی سی بی کی’مکمل حمایت کرتے ہیں‘۔

تاہم ان کا کہنا تھا کہ موجودہ حالات میں یہ بات واضح تھی کہ ٹورنامنٹ میں شرکت کرنے والی کچھ ٹیموں تحفظات کا شکار تھیں جو دور نہ کیے جا سکے۔ اس لیے ان حالت میں یہی بہتر سمجھا گیا کہ ٹورنامنٹ اکتوبر 2009 تک ملتوی کر دیا جائے۔ڈیوڈ مورگن کا کہنا تھا کہ انہیں امید ہے کہ اس وقت حالات ایسے ہوں گے جو کہ تمام ٹیموں کے لیے قابلِ قبول ہوں گے۔

یاد رہے کہ غیر ملکی ٹیموں کی جانب سے پاکستان میں کھیلنے پر تحفظات ظاہر کیے جانے کے بعد آئی سی سی نے ایک ٹاسک فورس بھی تشکیل دی تھی جس نے آسٹریلیا اور نیوزی لینڈ کا دورہ کر کے پاکستان کی صورتحال پر ان ممالک کے کرکٹ بورڈز کو مطمئن کرنے کی کوشش کی جو ناکام رہی۔

اسی دوران آئی سی سی نے چیمپئنز ٹرافی کرکٹ ٹورنامنٹ کے تمام میچ کراچی اور لاہور میں کروانے کا فیصلہ کیا تھا اور سکیورٹی بنیاد پر راولپنڈی کو میزبان شہروں کی فہرست سے خارج کر دیا تھا۔

چیمپئنز ٹرافی کے انعقاد پر بحث کے دوران یہ تجویز بھی سامنے آئی کہ چیمپئنز ٹرافی کو پاکستان سے کسی دیگر ملک منتقل کر دیا جائے۔ پاکستان نے اس تجویز کو رد کرتے ہوئے کہا تھا کہ اگر ایسا کیا گیا تو پاکستان اس ٹورنامنٹ میں شرکت نہیں کرے گا۔