عبدالرشید شکور بی بی سی اردو ڈاٹ کام، کراچی

	پچھلے چوراسی گھنٹوں میں ٹیم چھتیس گھنٹے کھیلتی رہی ہے

بنگلہ دیش کے خلاف سات وکٹوں کی کامیابی کے بعد پریس کانفرنس میں مہندر سنگھ دھونی سے جب بھارت کی بولنگ کے بارے میں سوال کیا گیا تو انہوں نےکہا کہ یقیناً وہ اس میچ میں اچھی نہیں رہی لیکن اس کی ایک بڑی وجہ یہ بھی ہے کہ پچھلے چوراسی گھنٹوں میں ان کی ٹیم چھتیس گھنٹے کھیلتی رہی ہے۔

لوگ کہاں ہیں؟  ان میچوں میں کراؤڈ نہیں ہے اور پولیس والے کم ازکم آرام سے میچ دیکھ رہے ہیں لگتا یوں ہے کہ جیسے ہم ان پولیس والوں کے لئے کھیل رہے ہیں دھونی

انہوں نے کہا کہ وہ اس شیڈول سے خوش نہیں ہیں۔انہوں نے کہا کہ دو ٹیموں کے لگاتار میچ رکھے گئے ہیں اور دو ٹیمیں ایسی ہیں جو لگاتار نہیں کھیلی ہیں۔
واضح رہے کہ بھارتی ٹیم کا پہلا میچ پچیس جون کو ہانگ کانگ کے خلاف تھا جبکہ وہ چھبیس جون کو پاکستان کے خلاف کھیلی اور اب اٹھائیس کو وہ تیسری مرتبہ میدان میں اتری ہے۔

اسی طرح سری لنکا کی ٹیم بھی دو دن میں دو میچ کھیلے گی۔اتوار کو اس کا میچ پاکستان سے ہے اور پیر کو وہ بنگلہ دیش کے خلاف مدمقابل ہوگی۔

دھونی نے اپنے فیلڈروں کے ڈراپ کیچوں کا سبب بھی میچوں کے سخت شیڈول کو قرار دیا تاہم انہوں نے نیشنل سٹیڈیم کی وکٹ پر اطمینان ظاہر کیا۔

مسلسل کرکٹ  بھارتی ٹیم کا پہلا میچ پچیس جون کو ہانگ کانگ کے خلاف تھا جبکہ وہ چھبیس جون کو پاکستان کے خلاف کھیلی اور اب اٹھائیس کو وہ تیسری مرتبہ میدان میں اتری ہے

بھارتی بیٹسمینوں کی تیز بیٹنگ کے بارے میں سوال پر کہ کیا یہ آئی پی ایل کا اثر تو نہیں؟ بھارتی کپتان نے کہا کہ یہ فیصلہ آپ کریں لیکن اگر ایک اچھی وکٹ پر ٹیم کو اچھا آغاز ملتا ہے تو کام آسان ہو جاتا ہے۔

دھونی نے الوک کپالی کی سنچری کو حیران کر دینے والی کارکردگی ماننے سے انکار کر دیا اور کہا کہ وہ انٹرنیشنل کرکٹر ہیں اور ایک اچھے بیٹسمین ہیں جنہوں نے حالات کا بھرپور فائدہ اٹھایا۔

دھونی نے ہنستے ہوئے کہا کہ وہ ٹاس ہی نہیں جیت پارہے ہیں لہذا انہیں ہر چیز قبول کرنی پڑرہی ہے ہوسکتا ہے کہ وہ ٹاس جیتیں تو پہلے بیٹنگ کریں۔

مہندر سنگھ دھونی نے اپنی پریس کانفرنس کا اختتام اپنے مخصوص انداز میں اس بات پر کیا کہ ان میچوں میں کراؤڈ نہیں ہے اور پولیس والے کم ازکم آرام سے میچ دیکھ رہے ہیں لگتا یوں ہے کہ جیسے ہم پولیس والوں کے لئے کھیل رہے ہیں۔