عبدالرشید شکور بی بی سی اردو ڈاٹ کام، کراچی

	خالد محمود 1971 میں پہلا ورلڈ کپ جیتنے والی پاکستانی ٹیم کے کپتان تھے

خالد محمود نے بی بی سی سے بات کرتے ہوئے اس بات کی تصدیق کی کہ انہیں پاکستان ہاکی فیڈریشن کے سکریٹری کے عہدے سے ہٹانے کے بارے میں وزیر کھیل کی جانب سے خط موصول ہوا ہے۔

خالد محمود جنہیں اخترالاسلام کی جگہ پاکستان ہاکی فیڈریشن کے صدر میرظفراللہ جمالی نے سکریٹری مقرر کیا تھا کہتے ہیں کہ پی ایچ ایف کا سکریٹری مقرر کرنے کا اختیار پی ایچ ایف کے صدر کو ہوتا ہے جس کے بعد سکریٹری بھی پی ایچ ایف کی کانگریس میں چار سال کے لیے منتخب ہوتا ہے یہ تقرری ایڈہاک کی بنیاد پر نہیں ہوتی ہے۔

انہوں نے کہا کہ جہاں تک انہیں سکریٹری کے عہدے سے ہٹانے کا تعلق ہے تو وزیر کھیل نے یہ غیر آئینی قدم اٹھایا ہے۔

خالد محمود نے جو1971 میں پہلا ورلڈ کپ جیتنے والی پاکستانی ٹیم کے کپتان تھے کہا کہ وہ اس طرح کی صورتحال کے عادی ہوچکے ہیں۔

سپورٹس بجٹ میں تنتیس فیصد کمی کھیلوں کی ترقی کی بات تو کی جاتی ہے لیکن اسی بجٹ میں سپورٹس کی مد میں تنتیس فیصد کی کمی کردی گئی ہے خالد محمود

آصف باجوہ کی ایڈہاک کی بنیاد پر سکریٹری کی حیثیت سے تقرری اس لیے حیران کن ہے کہ وہ کوچ کی حیثیت سے ناکام رہ چکے ہیں۔ جولائی2006 میں انہیں کوچ کا عہدہ اس لیے چھوڑنا پڑا تھا کہ پاکستان کو چیمپئنز ٹرافی میں ہالینڈ کے ہاتھوں نو گول کی ہزیمت اٹھانی پڑی تھی۔