ہندوستانی ٹیم بیجنگ اولمپکس کے لیے کوالفائی نہیں کر پائی ہے۔

خبر رساں ایجنسی اے ایف پی کے مطابق جیوتی کمارن نے ان الزامات کو بے بنیاد قرار دیا ہے۔ فیڈریشن کے صدر کے پی ایس گل نے اے ایف پی کو بتایا کے انہوں نے جیوتی کمارن کا استعفا منظور کر لیا ہے۔

’جیوتی کمارن نے مجھ سے فون پر بات کی اور مجھے بتایا کہ انہوں نے استعفا دیدیا ہے۔ ان کا اس وقت تک فیڈریشن سے کوئی واستہ نہیں ہوتا جب تک یہ الزامات غلط ثابت نہیں ہوجاتے۔‘

الزام ہندوستانی ٹی وی چینل ’آج تک‘ کی جانب سےایک سٹنگ آپریشن کے بعد لگایا گیا ہے۔ چینل کے مطابق اس کے صحافیوں نے مسٹر جیوتی کمارن سے یہ کہہ کر رابطہ کیا تھا کہ ان کا تعلق ایک صنعتی گھرانے سے ہے اور وہ ہندوستان میں ایک بین الاقوامی ہاکی ٹورنامنٹ کرانا چاہتے ہیں۔

ٹی وی چینل کا الزام  چینل نے اپنی رپورٹ میں الزام لگایا ہے کہ جیوتی کمارن اس کے صحافیوں سے پانچ لاکھ روپئے کے عوض ایک کھلاڑی کو سلطان ازلان شاہ ٹورنامنٹ کے لیے ہندوستانی ٹیم میں شامل کرانے کا وعدہ کیا تھا

چینل نے اپنی رپورٹ میں الزام لگایا ہے کہ جیوتی کمارن نے اس کے صحافیوں سے پانچ لاکھ روپے کے عوض ایک کھلاڑی کو سلطان ازلان شاہ ٹورنامنٹ کے لیے ہندوستانی ٹیم میں شامل کرانے کا وعدہ کیا تھا۔

یہ معاملہ منگل کو لوک سبھا میں بھی اٹھایا گیا جہاں اراکین پارلیمنٹ نے الزامات کی باقاعدہ تفتیش کرانے اور فیڈریشن کی کارروائی میں وفاقی حکومت کی جانب سے مداخلت کا مطالبہ کیا۔ (ہاکی فیڈریشن ایک خود مختار ادارہ ہے)
مسٹر جیوتی کمارن نےان الزامات کو یکسر مسترد کیا ہے۔’اس مرحلے پر میں صرف یہ کہہ سکتا ہوں کہ یہ الزامات بالکل غلط ہیں۔ یہ من گھڑت کہانی ہے اور میں اپنے صدر (کے پی ایس گل) سے بات کر کے میڈیا کو اپنے فیصلے سے مطلع کروں گا۔‘

لیکن مسٹر گل نے اے ایف پی کو بتایا کہ ’ یہ شرمناک بات ہے۔ میرے پاس اس کی مذمت کرنے کے لیے الفاظ نہیں۔ انہیں پیسے لیتے ہوئے دکھایا گیا۔ اب میرے لیے کہنے کو کیا باقی ہے۔‘

ہندوستان کی ہاکی فیڈریشن کو حال ہی میں سخت تنقید کا سامنا کرنا پڑا ہے کیونکہ قومی ٹیم تاریخ میں پہلی مرتبہ اولمپکس کھیلوں کے لیے کوالیفائی کرنے میں ناکام رہی ہے۔