خدیجہ عارف بی بی سی اردو ڈاٹ کام، دلی

	ایشیاء کپ 2007 کی فاتح ٹیم

ہندوستانی ہاکی ٹیم کے چیف کوچ جوخم کاروالہو نے کہا ہے کہ ہاکی کی ٹیم نے اس برس جب ایشیاء کپ جیتا تھا تو اس جیت کا ذکر برا‎ئے نام ہوا تھا اور ٹوئنٹی ٹوئنٹی چیمپئن ٹیم کو کرکٹ بورڈ، اشتہاری کمپنیاں اور ریاستی حکومتیں انعامات اور اعزازت سے نواز رہی ہیں۔

اطلاعات کے مطابق ہاکی ٹیم کے چیف کوچ رمیش پرمیسورن، مینجیر آر کے شیٹی، اور چار ديگر کھلاڑی کرناٹک کے وزیر اعلیٰ ایچ ڈی کمارا سوامی کے گھر کے سامنے بھوک ہڑتال کریں گے۔

خبر رساں ایجینسی پی ٹی آئی نے مسٹر جوخم کاروالہو کے ایک بیان کو شائع کیا ہے جس میں انہوں نے کہا ہے کہ ’ ہم صدر جمہوریہ پرتبھا پاٹل کے شکرگزار ہیں کہ ایشیاء کپ جیتنے کے بعد انہوں نے ہر کھلاڑی کو حظ لکھ کر مبارک باد دی تھی اور کرناٹک کے وزیر اعلیٰ نے آج تک کھلاڑیوں کو مبارکباد بھی نہیں دی ہے‘۔

کھلاڑیوں کا مطالبہ ہے کہ ریاستی حکومت انہیں پانچ پانچ لاکھ روپے دے۔

ہاکی کے سابق کھلاڑی ہربندر سنگھ کا کہنا ہے ’میں اس بات سے اتفاق رکھتا ہوں کے ہاکی کھلاڑیوں کو ایشیاء کپ میں ان کی جیت کے لیے انعام دیا جانا چاہیے، اس سے کھلاڑیوں کا جذبہ بڑھتا ہے‘۔

بھوک ہڑتال  اطلاعات کے مطابق ہاکی ٹیم کے چیف کوچ رمیش پرمیسورن، مینجیر آر کے شیٹی، اور چار ديگر کھلاڑی کرناٹک کے وزیر اعلیٰ ایچ ڈی کمارا سوامی کے گھر کے سامنے بھوک ہڑتال کریں گے

ہندوستان میں کرکٹ کو مذہب کی طرح سے مانا جاتا ہے اور کرکٹ کے سامنے باقی سارے کھیلوں کو کوئی اہمیت نہیں دی جاتی ہے۔

ہندوستان کی خواتین ہاکی ٹیم کے اسسٹنٹ کوچ اندرجیت سنگھ گل کا کہنا ہے کہ انہیں خوشی ہے کرکٹ ٹیم نے ٹوئنٹی ٹوئنٹی کپ جیتا ہے اور ان پر انعامات کی برسات کی جا رہی ہے لیکن یہ بات بھی صحیح ہے کہ ہندوستان میں کرکٹ کو کسی بھی کھیل سے زیادہ اہمیت دی جاتی ہے اور اس کی سب سے بڑی وجہ ہے کہ کرکٹ کے پاس اسپونسرز ہیں۔ اس برس ایشیاء کپ سے پہلے ہاکی اسوسی ایشن نے اعلان کیا تھا کہ ایگ گول کرنے پر کھلاڑی کو ایک ہزار روپے دیے جائیں گے۔ ایک ہزار روپے سے تو کھلاڑی اپنی ٹیم کو کسی اچھے ہوٹل میں چائے بھی نہیں پلا سکتا ہے‘۔

ہاکی کے سابق کھلاڑی اسلم شیر کا کہنا ہے کہ ہاکی کے کھلاڑیوں نے بھوک ہڑتال کا اعلان اس لیے کیا ہے کیونکہ جب وہ کوئی کپ جیتتے ہیں تو ان کے لیے نہ تو کوئی تقریبات کی جاتی ہیں اور نہ ہی انعاما ت دیے جاتے ہیں۔ جس طرح سے ٹوئنٹی ٹوئنٹی کپ جیتنے پر کرکٹ ٹیم کا استقبال کیا گیا اور ان پر انعامات کی بوچھاڑ کی گئی اس سے صاف لگتا ہے کہ ملک میں کوئی اور کھیل ہے ہی نہیں۔