گنگولی اور ڈراوڈ کو غلط آؤٹ دیا گیا: بھارتی بورڈ

بورڈ کے مطابق بھارت اور آسٹریلیا کے درمیان ہوئے ٹیسٹ میں ہندوستانی ٹیم کو امپائروں کے بعض غلط فیصلوں کا سامنا کرنا پڑا ہے۔

میچ کے آخری دن 333 رنز کے ہدف کے تعاقب میں ہندوستانی ٹیم کو مبینہ غلط فیصلوں کی وجہ سے دو اہم وکٹ کھونے پڑے تھے۔

راہل ڈراوڈ کو امپائر سٹیو بکنر نے وکٹ کے پیچھے کیچ آؤٹ دیا تھا جبکہ ٹی وی ری پلے میں صاف دکھائی دے رہا تھا کہ گیند ان کے بلے یا دستانوں کو چھوئے بغیر گلکرسٹ کے ہاتھوں تک پہنچی تھی۔

اس کے بعد انگلینڈ کے مارک بینسن نے سورو گنگولی کو اس وقت آؤٹ دے دیا جب مائیکل کلارک نے سلپ میں ان کا کیچ لیا۔ ٹی وی ری پلے سے معلوم ہوا کہ گیند زمین میں لگنے کے بعد کلارک کے ہاتھ میں آئی تھی۔ گنگولی وکٹ پر رکے رہے لیکن ایمپائر نے انہیں آؤٹ قرار دے دیا۔

غلط ایمپائرنگ  میچ کے آخری دن 333 رنز کے ہدف کے تعاقب میں ہندوستانی ٹیم کو مبینہ غلط فیصلوں کی وجہ سے دو اہم وکٹ کھونے پڑے تھے

ایمپائروں کے ان دو غلط فیصلوں کے خلاف بی سی سی آئی نے انٹرنیشنل کرکٹ کونسل یعنی آئی سی سی میں باقاعدہ شکایت درج کرانے کا فیصلہ کیا ہے۔

بی سی سی آئی کے نا‏ئب صدر راجیو شکلا نے خبر رساں ایجنسی پی ٹی آئی کو بتایا ’بی سی سی آئی کے صدر شرد پوار نے بورڈ کے اہلکاروں سے آئي سی سی میں امپائرنگ کے خلاف شکایت درج کرانے کو کہا ہے۔‘

ان کا مزید کہنا ہے کہ ٹی وی میں میں دوبارہ دیکھنے پر صاف معلوم ہوتا ہے کہ گنگولی اور ڈریوڈ کو غلط آؤٹ قرار دیا گیا اور ٹیم کے سابق سینئر کھلاڑی سنیل گواسکر نے بھی ان فیصلوں پر اپنی ناراضگی کا اظہار کیا ہے۔

ایمپائروں نے سڈنی ٹیسٹ کی پہلی اننگز میں بھی بعض غلط فیصلے دیئے تھے۔ اپنی پہلی اننگز میں آسٹریلیا 130 رنز پر چھ وکٹ گنوا چکا تھا اس کے بعد دو بار اینڈریو سائمنڈز کو آؤٹ ہونے کے باوجود آؤٹ نہیں دیا اور اس کی بدولت وہ 160 رنزبنا کر ناٹ آؤٹ رہے۔