عبدالرشید شکور بی بی سی اردو ڈاٹ کام، کراچی

	علیم ڈار ورلڈ کپ فائنل کھلانے والے کم عمر ترین امپائر ہیں

واضح رہے کہ اس فائنل کا اختتام میچ آفیشلز کی قوانین سے بہت زیادہ واقفیت یا لاعلمی کی بحث کے ساتھ اس طرح ہوا کہ بارش کی وجہ سے جب امپائرز نے کھیل روکا تو یہ سمجھا گیا کہ میچ ختم کردیا گیا ہے اور آسٹریلوی کھلاڑیوں نے جیت کا جشن منانا شروع کردیا لیکن انہیں بتایا گیا کہ ابھی تین اوورز باقی ہیں جو اگلے روز بھی کھلائے جاسکتے ہیں تاہم دونوں کپتانوں کی مشاورت سے یہ اوورز کرائے گئے لیکن انتہائی کم روشنی میں سلو بولرز نے یہ اوورز کرائے۔ بعد میں میچ ریفری جیف کرو نے اعتراف کیا کہ دونوں اننگز میں بیس اوورز مکمل ہونے کا مطلب واضح تھا کہ ڈک ورتھ لوئس قانون کے تحت میچ کا نتیجہ حاصل کرلیا جاتا۔

میچ کے بعد تقریب تقسیم انعامات تھی اور بھی بہت کچھ ہونا تھا۔ روشنی بھی خراب ہوگئی تھی لیکن چونکہ یہ میچ یکطرفہ ہوگیا تھا لہذا یہ اتنا بڑا ایشو نہیں ہے علیم ڈار

علیم ڈار نے باربیڈوس سے وطن واپسی پر بی بی سی سے بات کرتے ہوئے کہا ’دراصل ورلڈ کپ کی پلیئنگ کنڈیشنز عام میچوں سے قدرے مختلف تھیں جس کی وجہ سے میچ آفیشلز کے درمیان رابطے کے فقدان کے سبب غلط فہمی پیدا ہوئی۔‘

علیم ڈار کا کہنا ہے ’میچ کے بعد تقریب تقسیم انعامات تھی اور بھی بہت کچھ ہونا تھا۔ روشنی بھی خراب ہوگئی تھی لیکن چونکہ یہ میچ یکطرفہ ہوگیا تھا لہذا یہ اتنا بڑا ایشو نہیں ہے۔‘

علیم ڈار نہیں سمجھتے کہ اس واقعے پر آئی سی سی ان کے خلاف کارروائی کرسکتی ہے جس کی وجہ سے ان کا کریئر خطرے سے دوچار ہوسکتا ہے۔

علیم ڈار سے قبل پاکستان کے محبوب شاہ کو1987ء ورلڈکپ کے فائنل میں امپائرنگ کا اعزاز حاصل ہوچکا ہے لیکن علیم ڈار38 سال کی عمر میں ورلڈ کپ فائنل کھلانے والے کم عمر ترین امپائر ہیں۔

علیم ڈار جن کے کریڈٹ پر37 ٹیسٹ اور88 ون ڈے انٹرنیشنل میچز ہیں اس خواہش کے ساتھ ویسٹ انڈیز گئے تھے کہ پاکستانی ٹیم ورلڈ کپ کا فائنل کھیلے لیکن جب پاکستانی ٹیم پہلے ہی مرحلے میں ورلڈ کپ سے باہر ہوگئی تو انہوں نے اپنی کارکردگی پر غیرمعمولی توجہ دینی شروع کردی تاکہ اچھی رپورٹ کی بنیاد پر انہیں فائنل میں امپائرنگ کے اعزاز سے نوازا جائے اور فائنل سے دو دن پہلے علیم ڈار کو یہ خوش خبری سنا دی گئی۔