عبدالرشید شکور بی بی سی اردو ڈاٹ کام، کراچی

	یاسر عرفات (بائیں) اپنا پہلی ٹیسٹ کولکتہ میں کھیلیں گے

پچیس سالہ یاسرعرفات براستہ دبئی جمعہ کی صبح کولکتہ پہنچیں گے۔ وہ سات ون ڈے اور اکتیس ٹوئنٹی ٹوئنٹی میچز میں پاکستان کی نمائندگی کر چکے ہیں لیکن کوئی ٹیسٹ نہیں کھیلے ہیں۔

بھارت کے دورے پر موجود پاکستانی کھلاڑیوں کو فٹنس مسائل نے بری طرح گھیر رکھا ہے۔ کپتان شعیب ملک ٹخنہ مُڑ جانے کے سبب جمعہ سے کولکتہ میں شروع ہونے والے دوسرے ٹیسٹ میں شاید ہی کھیل سکیں۔

جبکہ شعیب اختر کو اسپتال سے فارغ کر دیا گیا ہے لیکن تیز بخار کے سبب وہ کمزوری محسوس کر رہے ہیں۔ پاکستان سے بھیجے جانے والے فاسٹ بولر محمد سمیع بھی سینے کے انفیکشن میں مبتلا ہیں جبکہ مڈل آرڈر بیٹسمین مصباح الحق کو بھی بخار نے گھیر رکھا ہے۔

ان تمام کرکٹرز نے ٹیم کی پریکٹس میں حصہ نہیں لیا ہے اور بیٹسمینوں کو پریکٹس کرانے کے لئے بولرز کم پڑگئے تھے جس کے بعد ٹیم کے منیجر سمیت دیگر اسٹاف نے بیٹسمینوں کو بیٹنگ کی پریکٹس کرائی ہے۔

لیگ اسپنر دانش کنیریا اور فاسٹ بولر سہیل تنویر ہی دو بولرز ہیں جو اس وقت فٹ ہیں اور اگر یاسرعرفات بر وقت کولکتہ نہ پہنچ سکے تو نہ چاہتے ہوئے بھی پاکستان کو لیفٹ آرم اسپنر عبدالرحمن کو ٹیم میں شامل کرنا پڑے گا۔

واضح رہے کہ ون ڈے سیریز کے اختتام پر فاسٹ بولر راؤ افتخار کو وطن واپس بھیج دیاگیا تھا اور محمد سمیع کو بھارت بھیجا گیا تھا۔