اینڈریو سمنڈز نے 88 گیندوں پر 107 رنز بنائے

یہ سات میچوں کی سیریز کا چھٹا میچ تھا اور اب تک آسٹریلیا نے چار جبکہ بھارت نے ایک میچ جیتا ہے جبکہ ایک میچ بارش کی نذر ہو گیا تھا۔

آسٹریلیا نے پہلے بلے بازی کرتے ہوئے پچاس اوورز میں آٹھ وکٹ کے نقصان پر 317 رنز بنائے جس کے جواب میں بھارتی ٹیم سات وکٹوں کے نقصان پر 299 رنز ہی بنا سکی۔

آسٹریلیا کی طرف سے اینڈریو سمنڈز نے 88 گیندوں پر 107 رنز بنائے۔ سمنڈز کے علاوہ آسٹریلیا کی طرف سے نائب کپتان ایڈم گلکرسٹ نے آٹھ چوکوں کی جانب سے 51 جبکہ کپتان رکی پونٹنگ نے49 رنز بنائے۔

ہندوستان کی جانب سے ظہیر خان نے 62 رنز دے کر دو جبکہ سری سانتھ، عرفان پٹھان، ہربھجن اور دنیش کارتک نے ایک ایک وکٹ لیا۔

تین سو سترہ رن کے ہدف کے تعاقب میں ہندوستان کی شروعات اچھی رہی اور سچن تندولکر اور سورو گنگولی نے پہلی وکٹ کی شراکت میں 140 رنز بنا ڈالے۔ اس موقع پر سچن نو چوکوں اور ایک چھکے کی مدد سے 72 رنز بنا کر آؤٹ ہوگئے۔ سورو گنگولی نے 86 رنز بنائے جبکہ تندولکر کے بعد میدان پر اترنے والے عرفان پٹھان 29 رنز بنا سکے۔

راہول ڈراوڈ ایک مرتبہ پھر ناکام رہے اور صرف سات رن بنا سکے جبکہ یوراج سنگھ بھی بڑا سکور نہ کر سکے۔ پانچ وکٹ گرنے کے بعد کپتان مہندر سنگھ دھونی اور رابن اتھاپا نے اچھے کھیل کا مظاہرہ کیا اور ٹیم کا سکور آگے بڑھانے کی کوشش کی تاہم وہ ٹیم کو فتح تک نہ پہنچا سکے۔رابن اتھاپا 28 گیندوں پر 44 رنز بنا کر آؤٹ ہوئے جبکہ دھونی بھی 26 رن بنا سکے۔

آسٹریلیا کی جانب سے بریڈ ہاگ نے چار، مچل جونسن نے دو جبکہ ہاپس نے ایک کھلاڑی کو آؤٹ کیا۔

آسٹریلیا اور بھارت کی اس سیریز میں ایک ٹوئنٹی ٹوئنٹی میچ بھی کھیلا جائے گا جو 17 اکتوبر کو ممبئی میں ہوگا۔