عبدالرشید شکور بی بی سی اردو ڈاٹ کام، ڈربن

انڈیا کے کھلاڑی گراؤنڈ میں فتح کی خوشی منا رہے ہے

ڈربن کا دلچسپ مقابلہ تصویروں میں

سہواگ، ہربھجن اور اتھپا نے کامیابی سے گیندیں اسٹمپس کو ہٹ کیں لیکن شاہد آفریدی، عمر گل اور یاسرعرفات وکٹیں اڑانے میں ناکام رہے۔

اسکاٹ لینڈ کے خلاف میچ بارش کی نذر ہونے کے بعد بھارتی ٹیم اسی صورت میں ٹوئنٹی ٹوئنٹی ورلڈ کپ سے باہر ہوسکتی تھی اگر پاکستانی ٹیم یہ میچ 14 اعشاریہ چار اوورز میں میچ جیت لیتی لیکن اس دلچسپ نتیجے کے بعد بھارت نے پاکستان کے ساتھ سپر ایٹ مرحلے تک رسائی حاصل کر لی۔

پاکستانی ٹاپ آرڈر بیٹنگ کی ایک بار پھر مایوس کن کارکردگی کھل کر سامنے آئی ۔ صرف مصباح الحق نے ذمہ داری کا مظاہرہ کرتے ہوئے نصف سنچری سکور کی۔ وہ ٹیم کو جیت کے قریب بھی لائے لیکن آخری گیند پر رن آؤٹ ہوکر اسے جیت سے دور بھی لے گئے۔

	محمد آصف نے ٹورنامنٹ کی سب سے بہترین بولنگ کی ہے

اس سے قبل شعیب ملک نے ٹاس جیت کر پہلے بھارت کو بیٹنگ دی تو محمد آصف نے چار وکٹیں حاصل کرکے بھارتی کیمپ میں مایوسی پھیلادی۔ بھارتی ٹیم مقررہ بیس اوورز میں نو وکٹوں پر141 رنز بناسکی۔

گوتم گمبھیر بغیر کوئی رن بنائے محمد آصف کی گیند پر انہی کے ہاتھوں کیچ ہوئے۔ وریندر سہواگ پانچ رنز پر بولڈ ہوئے۔ یوراج سنگھ ایک رن پر شعیب ملک کو کیچ دے گئے۔ دنیش کارتھک گیارہ رنز پر بولڈ ہوئے تو بھارت کا اسکور صرف36 رنز تھا۔

رابن اتھپا نے چار چوکوں اور دو چھکوں سے مزین نصف سنچری سے بھارت کی مشکلات کم کیں۔ وہ پچاس رنز بناکر کامران اکمل کے ہاتھوں کیچ ہوکر سہیل تنویر کی ٹوئنٹی ٹوئنٹی کی پہلی وکٹ بنے۔

عرفان پٹھان نے شاہد آفریدی کو دو چھکے لگائے لیکن پاکستانی پٹھان نے انہیں اگلی ہی گیند پر بیس کے انفرادی اسکور پر بولڈ کردیا۔ ہربھجن اور اگرکار کی وکٹیں جلد گرنے کے بعد رنز کی رفتار بھی تھم گئی۔

محمد آصف نے صرف18 رنز کے عوض چار وکٹیں حاصل کیں جو ٹوئنٹی ٹوئنٹی انٹرنیشنل کی سب سے بہترین بولنگ ہے۔ انہوں نے صرف دو دن قبل اسی کنگز میڈ میں اسکاٹ لینڈ کے خلاف چار وکٹیں19 رنز دے کر حاصل کی تھیں۔

انگلینڈ بمقابلہ آسٹریلیا

دوسری طرف انگلینڈ اور آسٹریلیا کے درمیان کیپ ٹاؤن میں ہونے والے میچ میں آسٹریلیا نے انگلینڈ کو آٹھ وکٹ سے شکست دی ہے۔

انگلینڈ نے پہلے کھیلتے ہوئے مقررہ بیس اوورز میں 135 رنز بنائے جس کے جواب میں آسٹریلیا نے صرف دو وکٹوں کے نقصان پر یہ ہدف پورا کر لیا۔

انگلینڈ کی طرف سے صرف اینڈریو فلنٹاف ہی 31 رنز بنا سکے۔ جبکہ آسٹریلیا کی طرف سے ایڈم گلکرسٹ نے 45 اور 67 رنز (ناٹ آؤٹ) بنائے۔

اس طرح آسٹریلیا نے آسانی کے ساتھ یہ ہدف 14.5 اوورز میں ہی پورا کر لیا۔

تاہم انگلینڈ کی ٹیم پھر بھی سپر ایٹ کے لیے کوالیفائی کر گئی ہے۔