عبدالرشید شکور بی بی سی اردو ڈاٹ کام، کراچی

	ثالثی عدالت کے نوٹس پر کرکٹ بورڈ کے چیئر مین ڈاکٹر نسیم اشرف نے سخت موقف اختیار کیا ہے

ورلڈ اینٹی ڈوپنگ ایجنسی ( واڈا ) کی جانب سے شعیب اختر اور محمد آصف کو بری کیے جانے کے فیصلے کو چیلنج کیے جانے کے بعد عالمی ثالثی عدالت نے پاکستان کرکٹ بورڈ کو نوٹس بھیجا تھا، جس پر پی سی بی کے چیئرمین ڈاکٹر نسیم اشرف نے سخت مؤقف اختیار کیا ہے۔

پی سی بی کے ترجمان کے مطابق انہوں نے اپنے قواعد وضوابط کے تحت ڈوپنگ کا معاملہ نمٹایا ہے اور جہاں تک عالمی عدالت کا تعلق ہے تو اسے سماعت کا اختیار نہیں کیونکہ یہ معاملہ اس کے دائرہ اختیار میں نہیں آتا۔

پی سی بی کے ترجمان سے جب پوچھا گیا کہ کیا سماعت ہونے کی صورت میں پاکستان کرکٹ بورڈ اس میں پیش ہو گا؟ تو انہوں نے کہا کہ وقت آنے پر اس کی حکمت عملی تیار کی جائے گی۔

شعیب اختر اور محمد آصف کو پی سی بی کے قائم کردہ اینٹی ڈوپنگ کمیشن نے ممنوعہ ادویات استعمال کرنے پر دو اور ایک سال کی پابندی کی سزا سنائی تھی لیکن بورڈ ہی کے قائم کردہ اپیل ٹریبونل نے انہیں بری کردیا تھا جس پر ورلڈ اینٹی ڈوپنگ ایجنسی کو اعتراض تھا۔

اہم بات یہ ہے کہ واڈا کا کہنا یہ ہے کہ دونوں بولرز کے کھیلنے یا نہ کھیلنے کا تعلق آئی سی سی سے ہے لیکن آئی سی سی اس بارے میں اپنی بے بسی ظاہر کرچکی ہے۔

پی سی بی نے جنوبی افریقہ کے دورے کے لیے اعلان کردہ ٹیم میں محمد آصف کو شامل کرلیا ہے تاہم فٹنس نہ ہونے کی وجہ سے شعیب اختر ٹیم میں جگہ بنانے میں کامیاب نہیں ہوسکے ہیں۔