مناء رانا بی بی سی اردو ڈاٹ کام، لاہور

	شہناز شیخ سنہ اٹھانوے۔ ننانوے اور دو ہزار تین میں بھی کوچ رہ چکے ہیں

پاکستان ہاکی فیڈریشن کے سیکرٹری نے یہ اعلان ہفتے کو کراچی میں ایک پریس کانفرنس میں کیا۔

شہناز شیخ اس وقت جدہ میں ہیں اور پاکستان ہاکی فیڈریشن کے سیکریٹری اختر الاسلام کے مطابق وہ پیر یا منگل تک پاکستان آ کر ٹیم کی ذمہ داری سنبھال لیں گے۔ شہناز شیخ کو ٹیم کے چیف کوچ اور مینجر کی دوہری ذمہ داری سونپی گئی ہے۔ سابق اولمپئن ناصر علی کو اسسٹنٹ کوچ اور شاہد علی خان کو گول کیپنگ کوچ مقرر کیا گیا ہے۔

اخترالاسلام نے بتایا کہ سابق چیف کوچ آصف باجوہ نے لاہور میں ہونے والی ملاقات میں ٹیم کی کوچنگ سے معذرت کر لی تھی۔ اخترالاسلام نے کہا کہ شہناز شیخ کو یہ ذمہ داری دو ٹورنامنٹس کے لیئے دی گئی ہے۔ اخترالاسلام اس سے پہلے عندیہ دے چکے ہیں کہ وہ عالمی کپ کے بعد پاکستانی ٹیم کے لیئے غیر ملکی کوچ لانے کا ارادہ رکھتے ہیں۔

بحثیت کھلاڑی شہناز شیخ کا کیرئر بہت شاندار رہا اور انہوں نے1969 سے 1979 تک پاکستان کی نمائندگی کی۔ اس دوران انہوں نے دو اولمپک گیمز میں شرکت کی جبکہ تین ایشین گیمز کھیلیں اور تینوں میں پاکستان نے گولڈ میڈل جیتا۔

اخترالسلام نے کہا کہ شہناز شیخ کو ہاکی کا وسیع تجربہ ہے اور وہ ٹیم کو جیت کی راہ پر ڈالنے کی صلاحیت رکھتے ہیں۔انہوں نے کہا کہ وہ ٹیم جس نے چمپئنز ٹرافی میں انتہائی ناقص کارکردگی دکھائی، یہی ٹیم قوم کو عالمی کپ میں زبردست مقابلہ کرتی ہوئی دکھائی دے گی۔

شہناز شیخ اس سے پہلے سنہ اٹھانوے۔ ننانوے اور سنہ دو ہزار تین میں بھی ٹیم کے کوچ رہ چکے ہیں لیکن اس دوران 2003 میں اذلان شاہ ٹورنامنٹ میں گولڈ میڈل حاصل کرنے کے علاوہ پاکستان کی ٹیم کوئی قابل ذکر کارکردگی نہیں دکھا سکی۔

بحثیت کھلاڑی شہناز شیخ کا کیرئر بہت شاندار رہا اور انہوں نے1969 سے 1979 تک پاکستان کی نمائندگی کی۔ اس دوران انہوں نے دو اولمپک گیمز میں شرکت کی جبکہ تین ایشین گیمز کھیلیں اور تینوں میں پاکستان نے گولڈ میڈل جیتا۔

پاکستانی ٹیم کا کیمپ آٹھ اگست سے ایبٹ آباد میں لگایا جا رہا ہے اور پاکستان ہاکی فیڈریشن نے پہلے ہی کیمپ کے لیئے پچیس کھلاڑیوں کے ناموں کا اعلان کر دیا ہے۔