اینڈریو سٹراس نے انڈین بالروں کا جم کر مقابلہ کیا

اس وقت پال کالنگ وڈ 11 اور فلنٹاف 17 رن کے ساتھ کریز پر موجود ہیں۔

تفصیلی سکور کارڈ کے لیئے کلک کریں

آؤٹ ہونے والے آخری انگلش کھلاڑی کیون پیٹرسن تھے جو 39 رن بنا کر سریسانتھ کا دوسرا شکار بنے۔

پہلے دن کے کھیل کی خاص بات انگلینڈ کی جانب سے اینڈریو سٹراس نے سنچری اور اویس شاہ کی نصف سنچری تھی۔ سٹراس 128 رن بنا کر ہربھجن سنگھ کی گیند پر آؤٹ ہوئے جبکہ اویس شاہ 50 رن بنانے کے بعد پٹھہ کھنچ جانے کے سبب کھیل جاری نہ رکھ سکے اور چائے کے وقفے کے بعد میدان میں نہیں آئے۔ اویس شاہ اور سٹراس کی شراکت میں سو سے زیادہ رن بنے۔

اس سے قبل انڈیا کے کپتان راہول ڈراِوڈ نے ٹاس جیت کر انگلینڈ کو پہلے بیٹنگ کرنے کی دعوت دی اور انگلینڈ کی جانب سے ایئن بیل اور اینڈریو سٹراس اننگز کا آغاز کیا۔انگلش اوپنروں کے درمیان پچاس رن کی پارٹنرشپ مکمل ہونے کے بعد جب انگلینڈ کا سکور 52 رن پر پہنچا تو ایئن بیل 18 رن بنا کر سریسانتھ کی گیند پر آؤٹ ہوگئے۔

میچ کے پہلے دن انڈین فیلڈروں کی فیلڈنگ خاصی خراب رہی اور انہوں نے متعدد کیچ چھوڑے۔

سیریز کےاس تیسرے میچ میں دباؤ انگلینڈ پر ہے کیونکہ انڈیا کو سیریز میں برتری حاصل ہے۔اس سیریز کا پہلا ٹیسٹ ڈرا ہوگیا تھا جبکہ دوسرا ٹیسٹ انڈیا نے جیتا تھا۔

اس ٹیسٹ میں انگلینڈ کے اوپنر الیسٹر کُک کی جگہ اویس شاہ، سٹیو ہارمیسن کی جیمز اینڈرسن اور این بلیک ویل کی جگہ شان یوڈل کو میدان میں اتارا گیا ہے جبکہ انڈیا کی جانب سے لیگ سپنر پیوش چاؤلہ کی جگہ فاسٹ بولر سری سانتھ کھیل رہے ہیں۔

	تیسرا ٹیسٹ میچ سچن تندولکر اور راہول ڈراوِڈ کے لیے خصوصی طور پر اہم ہے

ممبئی میں کھیلاجانے والا یہ ٹیسٹ میچ کپتان ڈراوِڈ اور سچن تندولکر کے لیے خصوصی طور پر اہم ہے۔ ڈراوِڈ کے لیے یہ ٹیسٹ ان کے کیریئر کا سوواں ٹیسٹ میچ ہے۔وہ سو ٹیسٹ میچ کھیلنے والے چھٹے بھارت کھلاڑی ہیں۔ ان سے قبل کپل دیو، سچن تندولکر، سنیل کواسکر، انیل کمبلے اور دلیپ وینگسارکر یہ اعزاز حاصل کر چکے ہیں۔

انڈیا کے سٹار بلے باز سچن تندولکر بھی اس ٹیسٹ میں شرکت کے بعد انڈیا کی جانب سے سب سے زیادہ ٹیسٹ میچ کھیلنے والے کھلاڑی بن گئے ہیں۔ یہ ان کا ایک سو بتیسواں ٹیسٹ میچ ہے۔ ان سے قبل یہ ریکارڈ انڈیا کے سابق کپتان اور آل راؤنڈر کپل دیو کے پاس تھا۔

انڈیا کی ٹیم: وسیم جعفر، وریندر سہواگ، راہول ڈراوِڈ (کپتان)، سچن تندولکر، یووراج سنگھ، ایم ایس دھونی (وکٹ کیپر)، عرفان پٹھان، ہربھجن سنگھ، انیل کمبلے، سریسناتھ، مناف پٹیل۔

انگلینڈ کی ٹیم: ایئن بیل، اینڈریو سٹراس، اویس شاہ، کیون پیٹرسن، پال کالنِگ وُڈ، اینڈریو فلنٹاف (کپتان)، گیرئنٹ جونز (وکٹ کیپر)، شان یوڈل، میتھیو ہوگارڈ، جیمز اینڈرسن، مونٹی پنیسر۔