عبدالرشید شکور بی بی سی اردو ڈاٹ کام کراچی

	انضمام الحق اور رکی پونٹنگ کے علاوہ کئی اور کھلاڑیوں نے بھی سپر سب قانون کی مخالفت کی۔

پاکستان کرکٹ بورڈ نے سری لنکن کرکٹ بورڈ کو تجویز پیش کی تھی کہ سترہ انیس اور اکیس مارچ کو کولمبو میں پاکستان اور سری لنکا کے درمیان ہونے والے تین ون ڈے میچوں میں سپر سب قانون کا استعمال نہ کیا جائے۔ سری لنکن کرکٹ بورڈ نے اس تجویز سے اتفاق کیا ہے۔

جنوبی افریقہ اور آسٹریلیا پہلے ہی اپنے درمیان جاری ون ڈے سیریز میں سپر سب کھلاڑی استعمال نہ کرنے پر اتفاق کرچکے ہیں۔

آئی سی سی نے سپر سب یعنی متبادل کھلاڑی میچ میں کسی دوسرے کھلاڑی کی جگہ استعمال کرنے کا قانون گزشتہ سال متعارف کرایا تھا لیکن اسے پاکستان اور آسٹریلیا کے کپتانوں انضمام الحق اور رکی پونٹنگ سمیت متعدد موجودہ اور سابق کرکٹرز کی شدید مخالفت کا سامنا رہا جن کا کہنا ہے کہ سپر سب کھلاڑی کا انتخاب ٹاس سے پہلے نہیں بلکہ ٹاس کے بعد ہونا چاہئے۔

آئی سی سی چند ہفتے قبل ہی سپر سب قانون کو ختم کرنے کا فیصلہ کرچکی ہے جس کی توثیق آئی سی سی کے ایگزیکٹیو بورڈ سے ہونی ہے۔

آئی سی سی کے چیف ایگزیکٹیو میلکم اسپیڈ کا کہنا ہے کہ سپر سب قانون کپتانوں کی ذہنی مہارت کے لئے تجرباتی طور پر متعارف کرایا گیا تھا لیکن اسے پذیرائی نہیں مل سکی۔