عبدالرشید شکور بی بی سی اردو ڈاٹ کام، لاہور

	انضمام الحق کے مطابق ہسپتال مارچ میں کام شروع کردے گا

وہ کرکٹ کے ساتھ ساتھ اب دین کی طرف خاصے مؤثر انداز میں راغب نظرآتے ہیں ساتھ ہی فلاحی کاموں کی طرف بھی ان کی سوچ گہری دکھائی دیتی ہے جس کی ایک شکل ملتان کا بختاور امین ٹرسٹ ہسپتال ہے۔

انضمام الحق نے اپنے دوست شیخ رشید کے ساتھ انسانیت کی خدمت کے جذبے کے تحت ایک ہسپتال کا جو خواب دیکھا تھا وہ اب حقیقت بن کر سب کے سامنے ہے۔

پاکستان اور بھارت کے درمیان ملتان کے ون ڈے سے دو روز قبل دونوں ٹیمیں اس ہسپتال کا دورہ کریں گی۔

انضمام الحق کا کہنا ہے کہ اس جنرل ہسپتال کا پچیس فیصد حصہ چار منزلہ بلاک کی صورت میں مکمل ہوچکا ہے جو مارچ میں کام شروع کردے گا۔

انہوں نے بتایا کہ اس ہسپتال میں چار آپریشن تھیٹر ہوں گے۔ پہلے مرحلے میں ستر بستر رکھے گئے ہیں جس میں اضافہ کیا جائے گا۔

انضمام الحق کا کہنا ہے کہ ہسپتال کے لیے قابل ڈاکٹروں اور پیرامیڈیکل سٹاف کی خدمات حاصل کی گئی ہیں اور اس میں غریبوں کا مفت علاج کیا جائے گا۔