آفریدی کی شمولیت تیسرے ایک روزہ میچ میں یقینی دکھائی دیتی ہے

نیشنل سٹیڈیم اور اس ہوٹل کو جہاں انگلینڈ کی ٹیم ٹھہری ہوئی ہے تقریباً تین ہزار نیم فوجی دستوں اور پولیس والوں نے گھیرا ہوا ہے۔

شدت پسندی اور فرقہ وارانہ تشدد کی وجہ سے سن 2001 سے لے کر آج تک کسی بھی غیر ملکی ٹیم نے کراچی میں کوئی میچ نہیں کھیلا ہے۔ انگلینڈ نے بھی حالیہ دورے میں کراچی میں ٹیسٹ کھیلنے سے انکار کیا تھا لیکن پھر ایک روزہ میچ کے لیے حامی بھر لی۔

حالیہ سیریز میں انگلینڈ اور پاکستان کے درمیان ابھی تک دو ایک روزہ میچ ہوئے ہیں جس میں سے ایک انگلینڈ نے جبکہ ایک پاکستان نے جیتا ہے۔

	گراؤنڈز مین نیشنل سٹیڈیم میں گھاس کاٹ رہا ہے

آفریدی پر پچ کو پاؤں سے خراب کرنے پر ایک ٹیسٹ میچ اور دو ایک روزہ میچوں کی پابندی لگائی گئی تھی۔

تیز بولر شعیب اختر اور اوپنر شعیب ملک بھی پوری طرح فٹ نہیں ہیں۔

انگلینڈ کی طرف سے کیون پیٹرسن کی جگہ وکرم سولنکی کھیلیں گے۔ پیٹرسن پسلی میں چوٹ کے باعث انگلینڈ واپس چلے گئے تھے۔

پاکستان کے کوچ باب وولمر کا کہنا ہے کہ ’پیٹرسن کی غیرموجودگی انگلینڈ کے لیے ایک بڑا دھچکہ ہے کیونکہ وہ ایک خطرناک کھلاڑی ہیں‘۔

	2001 سے کوئی غیر ملکی ٹیم کراچی میں میچ نہیں کھیلی ہے

پاکستان کے کپتان انضمام الحق کا کہنا ہے کہ اس شہر میں کھلاڑیوں کی سلامتی کو کوئی خطرہ نہیں ہے اور ’میرا خیال میں یہاں زیادہ سے زیادہ میچوں کا انتظام ہونا چاہیئے‘۔