عبدالرشید شکور بی بی سی اردو ڈاٹ کام، فیصل آباد

	شبیراحمد کے باولنگ ایکشن پر تیسری مرتبہ اعتراض کیا گیا ہے۔

پاکستانی کرکٹ ٹیم کے کپتان انضمام الحق نے بی بی سی سے بات کرتے ہوئے کہا کہ موجودہ صورتحال میں شبیراحمد کو چانس دینا مشکل نظر آتا ہے۔

انضمام الحق کا کہنا ہے کہ دونوں بولرز کے بولنگ ایکشن رپورٹ ہونا ٹیم کے لئے نقصان دہ ہے اور اس سے ان کی حکمت عملی بھی متاثر ہوئی ہے کیونکہ شبیراحمد کافی عرصے سے سب سے زیادہ وکٹیں لینے والے بولر ہیں۔

انضمام الحق کے مطابق شعیب ملک پانچویں بولر کا کردار بخوبی نبھارہے ہیں ان کی تین چار گیندوں پر اعتراض ہوا ہے لیکن شبیراحمد کامعاملہ زیادہ سنگین نوعیت کا ہے۔

شبیراحمد کے فیصل آباد ٹیسٹ نہ کھیلنے کی صورت میں باہر سے کسی متبادل کھلاڑی کی ٹیم میں شمولیت کو خارج ازامکان قرار دیتے ہوئے انضمام الحق نے کہا کہ اگر شبیراحمد نہ کھیلے تو رانا نویدالحسن کو موقع فراہم کیا جائے گا۔

پاکستانی کپتان نے بیٹنگ لائن میں ایک تبدیلی کا عندیہ دیا ہے۔ ان کا کہنا ہے کہ محمد یوسف کو صرف تھرو کرنے کا مسئلہ ہے وہ بیٹنگ کےلئے فٹ ہیں۔

عام خیال یہی ہے کہ پانچویں بولر کی کمی پورا کرنے کے لئے شاہد آفریدی کو حسن رضا کی جگہ ٹیم میں شامل کیا جاسکتا ہے۔