’میرے نزدیک یہ سپورٹس مین شپ نہیں بلکہ میری چالاکی تھی‘

پیٹرنز الیون کے خلاف میچ کے آخری دن مائیکل وان نے متعدد بار سلپ میں فیلڈنگ کرنے والے کھلاڑی کو اس وقت لیگ سلپ میں بھیج دیا تھا جبکہ گیند بالر کے ہاتھ سے نکل چکی تھی۔

میچ کے اختتام پر وان کا کہنا تھا کہ ’میرے نزدیک یہ سپورٹس مین شپ نہیں بلکہ میری چالاکی تھی۔ جیسے ہی بال نکلی، میں نے بہت تیزی سے حرکت کی‘۔

ان کا کہنا تھا کہ ’اگر کوئی کھلاڑی سوئیپ کرتا ہے تو یہ ایک آپشن ہے۔ ہم دیکھیں گے کہ ہم اسے ٹیسٹ میچوں میں استعمال کر سکتے ہیں یا نہیں‘۔

ایسا معلوم ہوتا ہے کہ وہ کرکٹ کے قانون نمبر41 سے ناواقف ہیں جس کے مطابق اس حالات میں کسی بھی فیلڈر کی جانب سے قابلِ ذکر حرکت جائز نہیں۔

یاد رہے کہ ایسی ہی ایک حرکت کی وجہ سے انگلینڈ کے سنہ 1987 کے دورہ پاکستان میں امپائر شکور رانا اور برطانوی کپتان مائیک گیٹنگ کے بیچ تلخ کلامی ہوئی تھی۔

مائیک گیٹنگ نے فیصل آباد ٹیسٹ کے دوران فیلڈنگ میں ایسی ہی تبدیلی کی تھی جس کی وجہ سے امپائر شکور رانا نے کہا تھا کہ وہ دھوکہ دہی کی کوشش کر رہے ہیں۔

تلخ کلامی کے بعد شکور رانا نے گیٹنگ کی جانب سے معذرت کیے جانے تک میچ دوبارہ شروع کرانے سے انکار کر دیا تھا اور اس میچ کا ایک دن کا کھیل اس جھگڑے کی نذر ہو گیا تھا۔