عبدالرشید شکور بی بی سی اردو ڈاٹ کام، کراچی

پاکستان اوپن سکواش چیمپئن شپ کراچی میں شروع ہوگئی

پیرنکول جوناتھن پاور اور لی بچل جیسے ٹاپ رینکنگ کھلاڑیوں کی غیرموجودگی کے باوجود پچیاسی ہزار ڈالرمالیت کی اس چیمپئن شپ کی اہمیت دیگر قابل ذکر کھلاڑیوں کی وجہ سے کسی طور کم نہیں ہوئی ہے۔

اتوار کو کھیلے گئے پہلے راؤنڈ کے آٹھوں میچز کسی غیرمتوقع نتیجے کے بغیر خاموشی سے گزرگئے۔ تھیری لنکو نے انگلینڈ کے بریڈلی بال کی مزاحمت پر قابو پاتے ہوئے چار گیمز میں کامیابی حاصل کی۔

گزشتہ سال کے رنراپ آسٹریلیا کے انتھونی رکٹس نے پاکستان کے شمس الاسلام کاکڑ اور مصر کے کریم درویش نے پاکستان کے سفیراللہ خان کو کسی دشواری کے بغیر ہرادیا۔

فن لینڈ کے اولی ٹومینن کی مصر کے ہشام ایم آشور کے خلاف کامیابی یکطرفہ رہی۔ سابق عالمی جونیئر چیمپئن ملائشیا کے اونگ بینگ ہی نے موجودہ عالمی جونیئر چیمپئن مصر کے رامی آشور کو چارگیمز میں زیر کیا۔

انگلینڈ کے نک میتھیو نے ہالینڈ کے ڈائلن بینیٹ اور مصر کے اذلان اسکندر نے انگلینڈ کے جوناتھن کیمپ کو شکست دی۔

پاکستان کے شاہد زمان نے کوالیفائر ہم وطن عاقب حنیف کوصرف اٹھارہ منٹ میں زیر کرلیا ان کا اصل مقابلہ اب دوسرے راؤنڈ میں عالمی نمبرایک تھیری لنکو سے ہے۔

شاہد زمان جو اسوقت اپنے کریئر کی بہترین چودویں رینکنگ پر ہیں تھیری لنکو کے خلاف اچھی کارکردگی کی توقع رکھے ہوئے ہیں۔

ان کا کہنا ہے کہ وہ ماضی میں عالمی نمبر ایک پیٹرنکول کو بھی ہراچکے ہیں اور اسوقت ان کی تمام تر توجہ اپنی رینکنگ کو بہتر بنانے پر مرکوز ہیں ماضی میں ان کے ساتھ بقول ان کے بہت سیاست کی گئی ہے لیکن اب انگلینڈ میں ٹریننگ کا فائدہ اٹھا کر وہ اچھے نتائج دینا چاہتے ہیں۔

پاکستان کے منصور زمان، عامر اطلس، خیال محمد، باسط اشفاق اور یاسربٹ
پیر کو پہلے راؤنڈ کے میچ کھیلیں گےان میں عامر اطلس جنہیں وائلڈ کارڈ انٹری ملی ہے دفاعی چیمپئن انگلینڈ کے جیمز ولسٹروپ کے مقابل ہونگے جبکہ منصور زمان کا مقابلہ فرانس کے باصلاحیت کھلاڑی گریگوری گالٹئر سے ہوگا جو انہیں دو مرتبہ شکست دے چکے ہیں۔