ہارون رشید
بی بی سی اردو ڈاٹ کام، پشاور |  |
|  ماریہ ایک درمیانے طبقے کے پشتون گھرانے سے تعلق رکھتی ہیں |
احمدزئی وزیر قبیلے کا ذکر آج کل خبروں میں تو القاعدہ اور طالبان کی وجہ سے بہت ہو رہا ہے لیکن اسی قبیلے نے پاکستان کو اس کی سکواش کی تاریخ کی سب سے کم عمر خاتون قومی چمپین ماریہ طورپکئی بھی دی ہے۔ اگرچہ کراچی میں گزشتہ ہفتے قومی اعزاز باآسانی جیتنے کی ایک وجہ کارلا خان جیسی سینیر کھلاڑیوں کی غیرموجودگی قرار دی جا سکتی ہے لیکن تیرا سالہ قومی چیمپین کو اس کی فکر نہیں۔ انہیں فکر ہے تو آنے والے معرکوں کی، نیپال میں ایشین چیمپین شپ کی اور پاکستان کو گولڈ میڈل دلانے کی۔ صوبہ سرحد کے ایف آر بنوں علاقے سے تعلق رکھنے والی ماریہ کو سکواش کی تنظیموں سے سخت شکایات ہیں۔ ان کا کہنا ہے کہ ایک لڑکی اور پھر ایسے علاقے سے جہاں عورتوں کے کھیل کود میں شرکت کی حوصلہ افزائی نہیں کی جاتی ان تنظیموں کا فرض بنتا ہے کہ وہ ان جیسی کھلاڑیوں کی ہر طرح سے بھرپور امداد کریں۔ ماریہ ایک درمیانے طبقے کے پشتون گھرانے سے تعلق رکھتی ہیں۔ ان کے والد شمس القیوم پولی ٹیکنیکل سینٹر میں آٹو انسٹرکٹر ہیں۔ انہوں نے بتایا کہ ماریہ بچپن سے لڑکوں کا لباس پہنتی رہی ہیں اور غصے کی بہت تیز ہیں۔ ’وہ ہمیشہ گلی محلے میں لڑکوں کے ساتھ کھیلتی اور لڑتی تھی۔‘ ان کے والد نے اسے پہلے ویٹ لیفٹنگ کا کھیل اپنانے کے لیے کہا اور ایک کوچ کے ذریعے اس کی تربیت کا انتظام کیا۔ اس کوچ کو بھی نہیں معلوم تھا کہ ماریہ لڑکی ہے لہذا اس نے انہیں پنجاب میں لڑکوں کے ویٹ لیفٹنگ کے ایک مقابلے میں چنگیز خان کے نام سے شریک کرایا۔ ماریہ نے اس مقابلے میں کامیابی حاصل کی۔ ’بعد میں مجھے احساس ہوا کہ اسے اپنے غصے پر قابو پانے کے لیے سکواش کا کھیل بہتر رہے گا جس میں وہ اپنا تمام تر غصہ گیند پر اتار سکے گی۔‘اس کے بعد سے صرف دو برسوں میں اس مردوں کے سمجھے جانے والے کھیل میں ماریہ نے کئی اعزازات حاصل کیے۔ وہ انڈر 13 اور انڈر 15 کے مقابلے جیتنے کے علاوہ سیف گیمز میں سلور میڈل بھی حاصل کر چکی ہیں۔ وہ روزانہ چار پانچ گھنٹے پریکٹس کرتی ہیں۔ وہ اپنی کامیابیوں کا ذمہ دار اپنے کوچ ناصر حسین اور والدین کو قرار دیتی ہیں۔ ان کے والد کا کہنا ہے کہ اپنی لڑکی کو اس طرح کھیل میں متعارف کروانے کی وجہ سے لوگوں نے انہیں بے غیرت ہونے جیسے طعنے بھی دیئے لیکن وہ ان سے متاثر نہیں ہوئے۔ ’اگر میری لڑکیوں میں ٹیلنٹ ہے تو میں کون ہوتا ہوں انہیں منع کرنے والا۔‘ ان کی ایک دوسری بیٹی گلالئی پشاور ٹی وی سے خبریں بھی پیش کرتی ہیں۔ ان کے کوچ ناصر حسین سے پوچھا کہ ماریہ میں کون سی خامیاں وہ دیکھتے ہیں جن پر قابو پانے سے وہ اپنے کھیل میں مزید نکھار لا سکتی ہیں تو ان کا کہنا تھا کہ انہیں اپنے وزن اور سٹیمنا پر نظر رکھنی ہوگی۔ ’اگر یہ دو چیزیں قابو میں آجائیں تو اسے کوئی بھی عالمی کھلاڑی بننے سے نہیں روک سکتا۔‘ ناصر پرامید ہیں کہ اگر مناسب تربیت جاری رہی تو ماریہ ایشین ٹائٹل بھی باآسانی جیت سکتی ہیں۔ صوبہ سرحد جسں نے اب تک ہاشم خان، روشن خان، جہانگیر خان، قمر زمان اور جان شیر خان جیسے سکواش کے عالمی چیمپین پیدا کیے اب اس کھیل میں خواتین کھلاڑی بھی پیدا کر رہا ہے۔ لیکن اس کی اصل وجہ سرکاری سرپرستی نہ پہلے رہی ہے اور نہ اب۔ ذاتی کوششیں ہی اس روایت کو زندہ رکھے ہوئے ہے۔ | 
یہ صفحہ دوست کو ای میل کیجیئے
پرِنٹ کریں
