ڈیویلیئرز 122 رن بنا کر ناٹ آؤٹ ہیں

جب دوسرے دن کا کھیل ختم ہوا تو جنوبی افریقہ نے صرف ایک وکٹ کے نقصان پر 253 رن بنائے تھے۔ جنوبی افریقہ کی جانب سے دونوں افتتاحی بلے بازوں نے سنچریاں سکور کیں۔ جنوبی افریقہ کے آؤٹ ہونے والے واحد کھلاڑی کپتان گریم سمتھ تھے جو 104 رن بنا کر آؤٹ ہوئے۔ ڈیویلیئرز 122 جبکہ ڈائپنار 23 رن پر کھیل رہے ہیں۔

جنوبی افریقہ کی جانب سے پہلی وکٹ کی شراکت میں 191 رن بنے۔

اس سے قبل جب دوسرے دن کا کھیل شروع ہوا تو ویسٹ انڈیز کی پہلی اننگز صرف 20 گیندوں بعد ہی سمٹ گئی۔

ویسٹ انڈیز نے اپنی اننگز 292 رنز سات کھلاڑی آؤٹ پر شروع کی لیکن اسی سکور پر پاول کو زونڈکی نے آؤٹ کر دیا۔ اس کے بعد 296 کے سکور پر ایڈورڈز اور براؤن بھی آؤٹ ہو گئے۔

زونڈکی نے پچاس رنز دے کر چار کھلاڑیوں کو آؤٹ کیا۔ اینڈرے نیل نے بھی 56 رنز دے کر چار وکٹ لیے۔

میچ کے پہلے دن ویسٹ انڈین بیٹسمین برائن لارا نے اپنے کیرئیر کی اٹھائیسویں سنچری اسکور کی تھی۔ صرف دو سو چوبیس گیندوں پر ایک سو چوہتر رن کی نہایت مشکل حالات میں اسکور کی گئی اس سنچری میں بیس چوکے تھے۔

جس وقت برائن لارا بیٹنگ کے لیے آئے تھے تو اس وقت جنوبی افریقہ کے خلاف بارباڈوس میں تیسرے ٹیسٹ کے پہلے روز ویسٹ انڈیز کے تین کھلاڑی صرف بارہ رن پر آؤٹ ہوچکے تھے۔ لیکن اس کے بعد لارا نے پہلے کپتان چندرپال اور پھر ڈوین براوو کے ساتھ لمبی شراکت کے ذریعے ٹیم کا اسکور مستحکم کردیا۔