ویسٹ انڈیز کے کپتان برائن لارا نے ایک سو چھپن رنز بنائے

کپتان برائن لارا کے 156 رنز کی مدد سے ویسٹ انڈیز نے پہلے کھیلتے ہوئے پچاس اوور میں چار وکٹ کے نقصان پر 339 رنز بنائے تھے۔ پاکستان نے اس کے جواب میں مقررہ پچاس اووروں میں نو وکٹ کے نقصان پر 281 رنز بنائے۔

پاکستان کی جانب سے یوسف یوحنا نے ایک چھکے اور ایک چوکے کی مدد سے چھیالیس گیندوں پر پینتالیس رنز بنائے اور رن آؤٹ ہوگئے۔ عبدالرزاق نے دو چوکوں کی مدد سے انچاس گیندوں پر چوالیس رنز بنائے اور بریوو کی گیند پر انہیں لارا نے کیچ آؤٹ کیا۔

جمعہ کی صبح پاکستان نے ٹاس جیت کر ویسٹ انڈیز کو بیٹنگ کرنے کی دعوت دی تھی۔

ویسٹ انڈیز کی طرف سے برائن لارا نے پانچ چھکوں اور بارہ چوکوں کی مدد سے صرف 138 گیندوں میں 157 رنز بنائے اور انہیں محمد حفیظ نے بولڈ کیا۔ لارا نے دو سو انچاس میچ کھیلے ہیں جن میں ان کا یہ دوسرا سب سے بڑا سکور تھا۔ انہوں نے کل انیس سنچریاں بنائی ہیں۔

لارا کے بعد ویسٹ انڈیز کے دوسرے کامیاب بیٹسمین چندر پال تھے۔ انہوں نے 85 رنز بنائے اور انہیں شاہد آفریدی کی گیند پر محمد حفیظ نے کیچ آؤٹ کیا۔ ہنڈز اور براوو نے بالترتیب تیس اور تین رنز بنائے اور آؤٹ نہیں ہوئے۔

پاکستان کی جانب سے نویدالحسن، افتخار انجم، شاہد آفریدی اور محمد حفیظ نے ایک ایک وکٹ لیا۔ پاکستان کی طرف سے اکتیس اضافی رنز دیے گئے جو گیارہ نو بالز، دس وائڈ، ایک بائی اور گیارہ لیگ بائی پر مشتمل تھے۔

گزشتہ ہفتے برِسبین میں کھیلے جانے والے میچ میں پاکستان نے ویسٹ انڈیز کو شکست دی تھی۔

آسٹریلیا اس سہ فریقی ٹورنامنٹ کے فائنل میں پہنچ چکا ہے جبکہ ویسٹ انڈیز کو فائنل میں پہنچنے کے لئے ایک اور میچ جیتنا ہوگا۔