میچ کا فیصلہ آخری اوور کی آخری گیند پر ہوا

سٹار بلے باز سچن تندولکر کے 123 رنز کی بدولت بھارت نے 315 رنز بنائے تھے اور پاکستان کو میچ جیتنے کے لیے 316 رنز کا ایک نہایت مشکل ٹارگٹ دیا تھا۔ یہ ٹارگٹ بھی پاکستان کو 48 اوورز میں پورا کرنا تھا کیونکہ میچ وکٹ گیلی ہونے کے سبب دیر سے شروع ہوا تھا۔ اس طرح میچ کے دو اوور کم کر دیے گئے تھے۔

لیکن پاکستان کے تقریباً سبھی ٹاپ آرڈر بیٹسمینوں نے عمدہ کھیل کا مظاہرہ کرتے ہوئے سکور کو 319 تک پہنچا دیا اور میچ کی آخری گیند پر انضمام الحق نے چوکا لگا کر پاکستان کی جیت کی مہر لگا دی۔ انضمام انسٹھ گیندوں پر ساٹھ رنز بنانے کے بعد ناٹ آؤٹ رہے اور اس طرح اپنی اچھی کارکردگی پر مین آف دی میچ قرار پائے۔ ان کے ساتھ کھیلنے والے محمد سمیع دس رن پر ناٹ آؤٹ رہے۔

یہ پہلی مرتبہ ہے کہ پاکستان نے ایک روزہ میچوں میں 300 سے زائد کا ٹارگٹ
پورا کیا ہے۔

پاکستان کی جانب سے شاہد آفریدی اور سلمان بٹ نے اننگز کا آغاز کیا۔ شاہد آفریدی 23 گیندوں پر 40 رن بنا کر بالا جی کی گیند پر آؤٹ ہو گئے۔ سلمان بٹ کو 48 رنز پر مرلی کارتک نے ایل بی ڈبلیو کیا۔

عبدالرزاق بھی 44 بنا کر تندولکر کی گیند پر آؤٹ ہوئے۔ ان کا کیچ مرلی کارتک نے لیا۔ شعیب ملک نے پر اعتماد بیٹنگ کا مظاہرہ کرتے ہوئے 65 رن بنائے۔ انہیں بھی کارتک نے آؤٹ کیا۔ یوسف یوحنا 11 رن بنا سکے اور ظہیر خان کا شکار بنے۔ جبکہ یونس خان اور کامران اکمل دونوں رن آؤٹ ہوئے۔

بھارت کی جانب سےمرلی کارتک نے دو، جبکہ بالا جی، تندولکر اور ظہیر خان نے ایک ایک وکٹ حاصل کی۔

عبدالرزاق نے بہت اچھی اننگز کھیلی

بھارت کے کپتان سورو گنگولی نے ٹاس جیت کر پہلے کھیلنے کا فیصلہ کیا اور سچن تندولکر اور سہواگ نے اننگز کا آغاز کیا۔ دونوں بلے بازوں نے بڑے اعتماد سے اننگز شروع کی لیکن جب سکور 65 پر پہنچا تو سہواگ یونس خان کی ایک عمدہ تھرو پر رن آؤٹ ہو گئے۔ تندولکر نے شاندار بلے بازی کا مظاہرہ کرتے ہوئے سنچری سکور کی۔ وہ 123 رن بنا کر شعیب ملک کی گیند پر بولڈ ہوئے۔

کپتان سورو گنگولی ایک مرتبہ پھر ناکام رہے اور 18 رن بنا کر رن آؤٹ ہوئے۔ مہندر دھونی کو47 رن پر شعیب ملک کی گیند پر کامران اکمل نے کیچ کیا۔ بھارت کے آخری آؤٹ ہونے والے کھلاڑی محمد کیف تھے جنہیں 5 کے انفرادی سکور پر محمد سمیع نے بولڈ کیا۔ اس سے قبل راہول ڈراوڈ 19 رن بنا کر رانا نوید الحسن کے ہاتھوں کیچ ہوئے تھے۔ یوراج سنگھ 35 جبکہ ظہیر خان بنا کوئی رن بنائے ناٹ آؤٹ رہے۔

پاکستان کی جانب سے شعیب ملک نے تین جبکہ محمد سمیع نے ایک وکٹ حاصل کی۔

سچن تندولکر 123 رن بنا کر آؤٹ ہوئے

پاکستان اور بھارت کے درمیان چوتھا ایک روزہ میچ گراؤنڈ گیلا ہونے کی وجہ سے تاخیر سے شروع ہوا ۔ بھارت نے ٹاس جیت کر پہلے بیٹنگ کرنے کا فیصلہ کیا اور وریندر سہواگ اور سچن تندولکر نے اننگز کا آغاز کیا

پاکستان کی طرف سے محمد سمیع اور رانا نوید الحسن نے بولنگ کا آغاز کیا۔

اسٹیڈیم کے اندر اور باہر سکیورٹی بہت سخت تھی اور پندرہ سو کے قریب پولیس اور فوج کے جوان شہر میں کسی قسم کی بدامنی روکنے کے لیے تعینات کیے گئے تھے۔

یاد رہے کہ احمد آباد میں غیرملکی ٹیموں کے ساتھ بدمزگی کے واقعات پہلے بھی ہوئے ہیں۔ ماضی میں تماشائیوں کی طرف سے پاکستان، آسٹریلیا اور ویسٹ انڈیز کی ٹیموں کے کھلاڑیوں پر پھل، پلاسٹک کی پانی کی بوتلیں اور پتھر پھینکے کے واقعات بھی پیش آئے ہیں۔

بھارت کی ٹیم: وریندر سہواگ، سچن تندولکر، ایم ایس دھونی، سورو گنگولی (کپتان)، راہول ڈراوڈ، یوراج سنگھ، محمد کیف، مرلی کارتک، ظہیر خان، اشیش نہرا۔

پاکستان کی ٹیم: سلمان بٹ، شاہد آفریدی، شعیب ملک، انضمام الحق (کپتان)، یوسف یوحنا، عبدالرزاق، کامران اکمل، یونس خان، محمد سمیع، نوید الحسن، دانش کنیریا۔