عبدالرشید شکور بی بی سی اردو ڈاٹ کام، موہالی

وریندر سہواگ کی عمدہ اننگز نے سکور کو تیزی سے بڑھا دیا

دوسرے دن تین گھنٹے چالیس منٹ کا کھیل صبح ہونے والی بارش کے سبب ضائع ہوگیا جبکہ کم روشنی کے سبب میچ دس اوورز پہلے ختم کردیا گیا۔

سہواگ اور گوتم گمبھیر نے پہلی وکٹ کے لئے سنچری شراکت قائم کرکے اپنی ٹیم کے لئے ایک بڑے اسکور کی بنیاد رکھ دی ۔ یہ دوسرا موقع ہے کہ ان دونوں نے پہلی وکٹ کی شراکت میں سو سے زائد رنز بنائے ہیں اس سے قبل گزشتہ دسمبر میں ان دونوں نے جنوبی افریقہ کے خلاف کانپور ٹیسٹ میں بھارتی ٹیم کو218 رنز کا زبردست آغاز دیا تھا۔

113 کے اسکور پر پاکستان کو پہلی کامیابی اسوقت حاصل ہوئی جب دانش کنیریا کی گیند پر گوتم گمبھیر41 رنز بناکر مڈآن پر رانا نویدالحسن کو کیچ دے بیٹھے۔

سہواگ نے اپنے مخصوص جارحانہ انداز میں پاکستانی بولرز کی خراب گیندوں کو رحم کے قابل نہ سمجھتے ہوئے باؤنڈری کا راستہ دکھانے میں کوئی رورعایت نہیں کی۔ انہوں نے نصف سنچری صرف49 گیندوں پر سات چوکوں اور ایک چھکے کی مدد سے مکمل کی۔ بولرز پر ان کے حاوی ہونے کا اندازہ اس بات سے لگایا جاسکتا ہے کہ بھارت کے پہلے پچاس رنز میں ان کا حصہ39 اور گمبھیر کا حصہ صرف8 رنز تھا۔

بھارتی ٹیم پاکستان کے پہلی اننگز کے اسکور312 سے128 رنز پیچھے ہے اور اس کی نو وکٹیں باقی ہیں۔

موہالی ٹیسٹ کی دونوں ٹیمیں یہ ہیں۔

پاکستان۔ انضمام الحق ( کپتان) سلمان بٹ، توفیق عمر، یونس خان ، یوسف یوحنا، عاصم کمال، عبدالرزاق، کامران اکمل، محمد سمیع، رانا نویدالحسن اور دانش کنیریا۔

بھارت۔ سوروگنگولی ( کپتان) وریندر سہواگ، گوتم گمبھیر، راہول ڈریوڈ، سچن ٹنڈولکر، وی وی ایس لکشمن، دنیش کارتھک، عرفان پٹھان، انیل کمبلے، ظہیرخان اور بالاجی۔