عبدالرشید شکور بی بی سی اردو ڈاٹ کام، موہالی

بھارت نے تاخیر سے اننگز کا آغاز کیا

دوسرے دن کے کھیل میں بھارت نے 184 رن بنائے ہیں اور اس کا 1 کھلاڑی آؤٹ ہوا ہے۔

بھارت کی طرف سے آؤٹ ہونے والے پہلے کھلاڑی گوتم گمبھیر تھے۔ وہ 46 رن بنا کر دانش کنیریا کی گیند پر نوید الحسن کے ہاتھوں کیچ آؤٹ ہوئے۔ ان کی جگہ نائب کپتان راہول ڈراوڈ کھیلنے آئے ہیں۔

وریندر سہواگ نے عمدہ بیٹنگ کا مظاہرہ کرتے ہوئے نصف سنچری مکمل کی۔ انہوں نے باون گیندوں میں اکیاون رن بنائے اور وکٹ پر موجود ہیں۔

پاکستان نے موہالی ٹیسٹ کے پہلے دن 312 رنز بنائے اور اس کے تمام کھلاڑی آؤٹ ہو گئے تھے۔ دوسرے دن بھارت کو اپنی پہلی اننگز کا آغاز کرنا تھا لیکن صبح سے جاری ہلکی بارش کی وجہ سے میچ شروع نہیں ہو سکا ہے۔

پہلے دن بھارت نے ٹاس جیت کر پاکستان کو بیٹنگ کی دعوت دی تھی۔ پاکستان نے عاصم کمال کے اکانوے رنز کی بدولت 312 رنز بنائے۔ بھارتی میڈیم فاسٹ بولر لکشمی پاتھا بالا جی نے پانچ کھلاڑیوں کو آؤٹ کیا تھا۔

سورو گنگولی نے ٹاس جیت کر پہلے پاکستان کو بیٹنگ دی لیکن اوپنرز سلمان بٹ اور توفیق عمر اچھا آغاز نہ دے سکے۔ سلمان بٹ صرف پانچ رنز بناکر عرفان پٹھان کی ان سوئنگ پر بولڈ ہوگئے۔ اس وقت پاکستان کا مجموعی سکور گیارہ تھا۔ تیس کے مجموعی اسکور پر نائب کپتان یونس خان ظہیرخان کی گیند پر ایل بی ڈبلیو ہوگئے وہ صرف نو رنز بناسکے۔

توفیق عمر جو گزشتہ سال بھارت کے خلاف راولپنڈی ٹیسٹ کے بعد دوبارہ ٹیسٹ ٹیم میں شامل کیے گئے ہیں چوالیس رن بناکر بالاجی کی گیند پر بولڈ ہوگئے۔ یوسف یوحنا چھ رن بنا سکے انہیں عرفان پٹھان نے آؤٹ کیا۔ کپتان انضمام الحق نے ستاون رن بنائے انہیں انیل کمبلے نے پر ایل بی ڈبلیو آؤٹ کیا۔عبدالرزاق چھبیس رن بنا کر بالا جی کی گیند پر کارتک کے ہاتھوں کیچ آؤٹ ہوئے۔

بھارت کی جانب سے عرفان پٹھان، انیل کمبلے نے دو دو اور اور بالا جی نے پانچ وکٹیں حاصل کیں۔ جبکہ ظہیر خان نےایک وکٹ حاصل کی ہے۔

میچ کے امپائرز آسٹریلیا کے ڈیرل ہیئر اور جنوبی افریقہ کے روڈی کرٹزن ہیں جبکہ انگلینڈ کے کرس براڈ میچ ریفری ہیں۔

موہالی ٹیسٹ کی دونوں ٹیمیں یہ ہیں۔

پاکستان۔ انضمام الحق ( کپتان) سلمان بٹ، توفیق عمر، یونس خان ، یوسف یوحنا، عاصم کمال، عبدالرزاق، کامران اکمل، محمد سمیع، رانا نویدالحسن اور دانش کنیریا۔

بھارت۔ سوروگنگولی ( کپتان) وریندر سہواگ، گوتم گمبھیر، راہول ڈریوڈ، سچن ٹنڈولکر، وی وی ایس لکشمن، دنیش کارتھک، عرفان پٹھان، انیل کمبلے، ظہیرخان اور بالاجی۔