عبدالرشید شکور بی بی سی اردو ڈاٹ کام کراچی

بھارت سے خوشگوار یادیں وابستہ ہیں: حنیف محمد

حنیف محمد نے بی بی سی سے بات کرتے ہوئے خوشگوار حیرت ظاہر کرتے ہوئے کہا کہ انہیں ابھی تک اس بارے میں کوئی اطلاع نہیں ہے لیکن اگر وہ بھارت جاتے ہیں تو یہ ان کے لئے خوشی کا لمحہ ہوگا کیو نکہ بھارت سے ان کی خوشگوار یادیں وابستہ ہیں۔

حنیف محمد ان خوش قسمت کرکٹرز میں سے ایک ہیں جنہیں پاکستان کے اولین ٹیسٹ میچ میں نمائندگی کا اعزاز حاصل ہوا۔ وہ 53-1952 میں بھارت کا دورہ کرنے والی پاکستان کی پہلی ٹیسٹ ٹیم کے کھلاڑی تھے جس کے بعد انہوں نے 61-1960 میں بھی بھارت کا دورہ کیا۔

حنیف محمد کے ذہن میں اس دور کی یادیں آج بھی تازہ ہیں۔ وہ کہتے ہیں کہ پہلے دورے میں وہ ٹیم کے سب سے کم عمر کھلاڑی تھے پاکستانی ٹیم ناتجربہ کار تھی اس کے برعکس بھارت کے پاس وجے ہزارے ، وجے مرچنٹ ، ونو منکڈ ، لالہ امرناتھ اور پولی امریگر جیسے تجربہ کار کھلاڑی تھے لہذا ان کی موجودگی میں انہیں بہت کچھ سیکھنے کا موقع ملا۔

حنیف محمد کا کہنا ہے کہ دونوں ادوار میں انہوں نے بہت دوست بنائے اور بھارتی کرکٹر رام چند سے ان کی بڑی دوستی رہی۔

لٹل ماسٹر حنیف محمد کو وہ واقعہ آج بھی یاد ہے جب لتامنگیشکر گلدستہ لے کر ان سے ملنے آئی تھیں اور انہوں نے کہا تھا کہ وہ ان کی زبردست مداح ہیں۔

حنیف محمد کہتے ہیں کہ چھ سال کے طویل انتظار کے بعد پاکستانی ٹیم کا بھارت کا یہ دورہ خوش آئند ہے اور انہیں یقین ہے کہ شائقین کی دلچسپی اسی طرح دیکھنے میں آئے گی جس طرح گزشتہ سال بھارتی ٹیم کے دورۂ پاکستان میں مناظر دیکھنے میں آئے تھے۔ پاکستان اور بھارت کے کرکٹ روابط اس خطے کے لئے بہت ضروری ہیں اور یہ سلسلہ جاری رہنا چاہیے۔