عبدالرشید شکور
بی بی سی اردو ڈاٹ کام، کراچی |  |
|  پاک ہاکی کا کھویا وقار کیسے بلند کیا جا سکتا ہے؟ |
وزیراعظم کی جانب سے پاکستان ہاکی فیڈریشن کا صدر مقرر کیے جانے کے بعد طارق کرمانی کے، جو پاکستان سٹیٹ آئل کے مینیجنگ ڈائریکٹر ہیں، ارادے بلند دکھائی دیتے ہیں۔ لیکن ہاکی سے کوئی باقاعدہ تعلق نہ ہونے کے سبب وہ فوری طور پر فیڈریشن کے سیٹ اپ میں کسی بڑی تبدیلی کے بجائے حالات کا بغور جائزہ لے رہے ہیں۔ طارق کرمانی نے جمعرات کو کراچی میں سابق اولمپئنزاور انٹرنیشنل کھلاڑیوں سے ملاقات کی اور یہ جاننے کی کوشش کی کہ پاکستان ہاکی کا کھویا ہوا وقار کیسے بلند کیا جا سکتا ہے۔ طارق کرمانی کا کہنا ہے کہ پاکستان ہاکی کو پروفیشنل بنیادوں پر استوار کر کے گئے دن واپس لائےجا سکتے ہیں۔ انہوں نے کہا کہ وہ فروری کے آخر تک اپنے ارادوں اور خواہشات کو پالیسی کی شکل دینے میں کامیاب ہو جائیں گے۔ طارق کرمانی یہ ماننے کے لیے تیار نہیں کہ پاکستان ہاکی زوال پذیر ہے ان کے خیال میں چند نتائج خراب ضرور رہے ہیں۔ وہ کہتے ہیں کہ جنرل ( ریٹائرڈ) عزیز خان کے برعکس ان کا سویلین ہونا ان کے کام کرنے میں رکاوٹ نہیں بنے گا۔ طارق کرمانی مستقبل میں ہاکی کو علاقائی بنیاد پر فروغ دینے کے خواہشمند ہیں۔
ان سے پوچھاگیا کہ کیا آپ بھی مشیروں کی سب اچھا ہے والی رپورٹس پر انحصار کریں گے تو ان کاجواب تھا کہ انہیں اپنے اختیارات استعمال کرنا بخوبی آتا ہے۔ پاکستان ہاکی فیڈریشن کے صدر کا کہنا ہے کہ کوئی بھی فیصلہ سیاسی بنیاد پر نہیں بلکہ میرٹ پر کیا جائے گا۔ انہوں نے کہا کہ ان کے پاس جادو کی چھڑی نہیں اس لیے حالات بہتر ہونے میں وقت لگے گا اور مطلوبہ نتائج سامنے آئیں گے۔ | 
یہ صفحہ دوست کو ای میل کیجیئے
پرِنٹ کریں
