سنہ دو ہزار بارہ تک موبائل فون پر انٹرنیٹ کا استعمال ایک اعشاریہ دو بلین ہو جائے گا

انٹیل کی تحقیق کے مطابق سنہ دو ہزار بارہ تک موبائل فون پر انٹرنیٹ کا استعمال ایک اعشاریہ دو بلین ہو جائے گا۔ یہ تحقیق انٹیل موبائل فون کے لیے اپنی نئی چِپ کی رونمائی پر منظر عام پر لے کر آئی ہے۔

انٹیل کے گاڈی سنگر نے کہا ’موبائل انٹرنیٹ کی مانگ ہے اور ضرورت بھی اور ہماری نیی چِپ ان ضروریات کو پورا کر سکتی ہے۔‘

انٹیل کا کہنا ہے کہ انٹرنیٹ کے علاوہ سنہ دو ہزار گیارہ تک تقریباً سو ملین گھرانے آئی پی ٹی وی دیکھیں گے۔ ’چونکہ لوگوں کو انٹرنیٹ کی ضرورت ہے اس لیے وہ چاہیں گے کہ صرف میزوں ہی پران کو انٹرنیٹ مہیا نہ ہو بلکہ ہر جگہ ہو۔‘

تجزیہ کار انٹیل کی موبائل فون کی مارکیٹ میں کارکردگی کو دیکھ رہے ہیں جہاں انٹیل کی کارکردگی کچھ اچھی نہیں ہے۔ ان کا کہنا ہے کہ انٹیل بنیادی طور پر موبائل فون کی مارکیٹ میں صفر سے شروع کر رہی ہے۔

تجزیہ کار ٹول ہارٹ نے کہا ’موبائل فون کی مارکیٹ میں بہت پیسے ہے اور موبائل انٹرننیٹ کی مانگ ہے۔ دیکھنا یہ ہے کہ انٹیل مارکیٹ میں پہلے ہی سے موجود کمپنیوں کے ساتھ مقابلہ کیسے کرے گی۔‘