 | | | برطانیہ میں موبائل فون کا استعمال بڑھ رہا ہے |
برطانیہ میں ذرائع ابلاغ کی نگرانی کرنے والے ادارے آفکوم کی ایک رپورٹ کے مطابق برطانیہ میں لینڈ لائن کے مقابلے میں موبائل فون کے صارفین کی تعداد میں اضافہ ہو رہا ہے۔ رپورٹ کے مطابق گزشتہ سال لینڈ لائن اور موبائل پر صرف کیے گئے منٹوں کی کل تعداد دو سو پنتیس ملین تھی جن میں موبائل فون پر صرف کیے گئے منٹوں کی تعداد بیاسی ملین تھی۔ رپورٹ میں یہ بھی کہا گیا ہے کہ برطانیہ میں نو فیصد گھروں میں کال کرنے کے لیے صرف موبائل فون پر انحصار کیا جاتا ہے جبکہ صرف سات فیصد گھر ایسے ہیں جہاں صرف لینڈ لائن استعمال ہوتی ہے۔ آفکوم کے ترجمان پیٹر فلپس کا کہنا ہے کہ ’سال دو ہزار سات کے پہلے حصے میں ایسے گھریلو صارفین کی تعداد میں اضافہ ہوا ہے جہاں کال کرنے کے لیے صرف موبائل فون کا استعمال کیا جاتا ہے‘۔ گزشتہ سال لینڈ لائن کے گھریلو صارفین میں بلترتیب کمی دیکھنے میں آئی اور اس میں 1.5 فیصد سے 33.6 ملین تک کمی آئی۔ اس کے برعکس موبائل فون کمپنیاں اپنی حریف کمپنیوں کے مقابلے میں سستی سروس کی فراہمی اور بلیو بیریز اور پی ڈی ایز کی بڑھتی ہوئی ڈیمانڈ کو نظر میں رکھتے ہوئے اپنے صارفین کو پرکشش پیکیج مہیہ کر رہی ہیں جس کے باعث موبائل فون کے صارفین کی تعداد میں اضافہ ہو رہا ہے۔ آفکوم کی رپورٹ میں بتایا گیا ہے کہ بچوں میں بھی موبائل فون کے استعمال میں اضافہ دیکھنے میں آیا ہے۔ سال دو ہزار چھ کے اعداد و شمار کے مطابق آٹھ سے پندرھ سال کی عمر کے بچوں کی 53 فیصد تعداد موبائل فون کا استعمال کرتی ہے جبکہ اس سے گزشتہ سال یہ تعداد پچاس فیصد تھی۔ آفکوم کے مطابق ٹیلی کام کی سہولیات جن میں لینڈ لائن، موبائل، ایس ایم ایس پیغامات اور براڈ بینڈ شامل ہیں کی قیمتوں میں بھی کمی آئی ہے۔ دو ہزار پانچ میں گھریلوں صارفین ان سہولیات کے لیے ہر ماہ اوسطاً 76.36 پاؤنڈ خرچ کرتے تھے لیکن دو ہزار پانچ یہ قیمت کم ہو کر 68.85 پاؤنڈ تک پہنچ گئی۔ | 
تصویر کشی، کبھی بھی کہیں بھی
