موبائل فون سے بجلی جسم میں جاسکتی ہے

برطانیہ کے ایک طبی جریدے میں ایک لڑکی کی کہانی شائع کی گئی ہے جو بارش کے دوران گھر سے باہر موبائل فون پر بات کر رہی تھی جب اس پر بجلی گر پڑی اور وہ بری طرح جھلس گئی۔

موبائل فون میں موجود دھات کے ذریعے بجلی لڑکی کے بدن میں منتقل ہوگئی جس وہ بری طرح زخمی ہو گئی۔

یہ واقع لندن کے ایک پارک میں پیش آیا۔بجلی گرنے کی نتیجے میں جس کان پر اس نے موبائل فون لگا رکھا تھا اس کا پردہ پھٹ گیا اور وہ سننے کی صلاحیت سے محروم ہو گئی۔

ماہرین موسمیات کے مطابق دنیا بھر میں ہر وقت ایک ہزار آٹھ سو کے قریب طوفان بادوباراں یا گرج چمک کے ساتھ بارشیں ہوتی رہتی ہیں۔ اس کے علاوہ ہر سیکنڈ میں اوسطً سو جگہوں پر بجلی گرتی ہے۔

بجلی کا کڑکا یا بجلی کی لہر چودہ ہزار میل فی گھنٹہ کی رفتار سے سفر کرتی ہے زمین پر پہنچتی ہے جس میں تین لاکھ والٹ کی بجلی ہوتی ہے اور یہ سب ایک سینکڈ کے ہزارویں حصہ میں ہوجاتا ہے۔ اس سے قرب و جوار کی فضا میں درجہ حرارت تیس ہزار سینٹی گریڈ تک پہنچ جاتا ہے جو کہ سورج کے درجہ حرارت سے پانچ گنا زیادہ ہے۔

نارتھ وک پارک ہسپتال لندن میں جن ڈاکٹروں نے اس لڑکی کا علاج کیا تھا وہ اس سے قبل تین اور لوگوں کا علاج کر چکے ہیں جو موبائل فون سنتے وقت بجلی گرنے کی وجہ سے زخمی ہو گئے تھے۔ تاہم ان تنیوں میں سے کوئی بھی جانبر نہ ہوسکا۔

ڈاکٹروں کا کہنا ہے کہ گو بجلی گرنے کے امکانات بہت کم ہوتے ہیں لیکن اس کے باوجود یہ صحتِ عامہ کا مسئلہ ہے۔

ڈاکٹروں کا کہنا ہے کہ عام حالت میں بجلی انسانی جسم کے اندر سراعیت نہیں کرتی لیکن اگر آپ موبائل فون پر بات کر رہے ہوں تو اس یہ آپ کے جسم کے اندر سراعیت کر جاتی ہے جس میں کہیں زیادہ نقصان ہو سکتا ہے۔