کیمرہ فون رکھنے والے افراد اخباروں کی تازہ ترین خبروں کے لیے نعمت ثابت ہوئے ہیں۔ ایسے افراد رونما ہوتے واقعہ کی تازہ ترین تصویر اتار لیتےہیں جبکہ اخبار کے فوٹوگرافروں کو جائے وقوع پر پہنچنے میں وقت لگتا ہے۔

اگرچہ مشہور شخصیات ان نئے موبائل کیمرہ والے پاپارازی فوٹوگرافروں سے زیادہ خوش نہیں کیونکہ ان کی آمد سے ستاروں کی نجی زندگی مزید مشکل ہو گئی ہے۔

لاس اینجیلس کے ایک اخبار نے اپنے فوٹوگرافروں کو رپورٹنگ کے لیے کیمرے والے فون فراہم کیے ہیں۔

یہ ایک ایسے رواج کا آغاز ہے جس میں بہتر کوالٹی کے کیمرہ فونوں کےمارکیٹ میں آنے کے بعد اضافہ ہو گا۔

گزشتہ ہفتے ہالینڈ کے شہر ایمسٹرڈم کے ایک مقامی اخبار نے مقتول فلمساز تھیو واں گوغ کی لاش کی ایک ایسی تصویر شائع کی تھی جو کہ ایک کیمرہ فون سے وقوعہ کے چند لمحات بعد لی گئی تھی۔

اخبار کے ایڈیٹر پیٹر شونین کا کہنا تھا کہ ’ وہ تصویر ہی اصل کہانی تھی‘۔

بات اب روایتی میڈیا کے عام لوگوں سے خبر کے مواد خریدنے تک نہیں رہی بلکہ اب تازہ ترین صحافت آن لائن ڈائری اور ویب لاگ کی شکل میں سامنے آ رہی ہے۔ صحافت کی یہ شکل امریکی الیکشن میں واضح طور پر ابھر کر سامنے آئی ہے۔

ڈیجیٹل آرٹسٹ ہنری ریچلڈ نے بتایا کہ ’ لوگ زیادہ تر اپنا کیمرہ ہر وقت اپنے ساتھ نہیں رکھتے جبکہ موبائل فون ہر وقت ان کے پاس ہوتا ہے۔ جونہی کوئی واقعہ رونما ہوتا ہے لوگ اپنے کیمرہ فون کا استعمال کرنا شروع کر دیتے ہیں‘۔

کیمرہ فون کو مثبت مقاصد کے لیے بھی استعمال کیا جا رہا ہے۔

امریکہ کی ریاست الباما میں کیمرہ فون کو بچوں سے متعلقہ جرائم اور موقع واردات کی تصاویر اتارنے کے لیے استعمال کیا جا رہا ہے اور اس کی مدد سے حکام کئی جنونی ملزمان کو سزا دلوانے میں کامیاب رہے ہیں۔

چین کے دارالحکومت بیجنگ میں عدالتوں نے موبائل فون سے لی گئی تصاویر کو بطور ثبوت تسلیم کرنا شروع کر دیا ہے ۔