اپنی انگلیوں کو بولنے دیں جاپان کی ایک کمپنی نے ایسا فون ایجاد کیا ہے جو گھڑی کی مانند کلائی پر باندھا جاسکتا ہے اور فون کے ’ائیر پیس‘ یا سننے والے حصے کی جگہ انسانی انگلی، آوازیں کان تک منتقل کرتی ہے۔ نت نئے فون کی ایجادات کی دوڑ میں یہ ایک نئی پیش رفت ہے۔ جاپانی کمپنی این ٹی ٹی کے ماہرین کے مطابق یہ فون آواز یا بات چیت کو متحرک لہروں میں تبدیل کردیتا ہے جوکہ بذریعہ انسانی انگلی کان تک پہنچتی ہیں اور یوں اپنی ہی انگلی سے آوازیں سنی جاسکتی ہیں۔ اس فون کا اصل حصہ کلائی پر باندھا جانے والا حصہ ہے۔ ماہرین کے مطابق فون موصول ہونے پر اگر کلائی پر بندھے فون والے ہاتھ کی شہادت کی انگلی اور انگوٹھے کو باہم ملایا جائے اور پھر انگلی کو کان کے نزدیک لے جایا جائے تو معلوم ہوجائے گا کہ فون کرنے والا کون ہے جبکہ کلائی پر لگے مائیکروفون میں جواب دیا جاسکے گا۔ کال ختم کرنے کے لئے بھی انگلی اور انگوٹھے کو جوڑنا کافی ہوگا۔ اس فون میں کوئی بٹن نہیں ہے تاہم فون ملانے کے لئے اب نمبر ڈائل کرنے کی ضرورت نہیں، صرف فون کے مائیکروفون میں نمبر بولنا ہی کافی ہوگا۔ تاہم ابھی یہ نہیں معلوم ہوسکے گا کہ آیا اس فون سے تحریری پیغام بھیجا جاسکتا ہے یا نہیں۔ اب تک این ٹی ٹی نے یہ نہیں بتایا ہے کہ اس نئی ایجاد کو مارکیٹ میں لانے کے لئے کتنا عرصہ درکار ہے۔ | 
یہ صفحہ دوست کو ای میل کیجیئے
پرِنٹ کریں
