نک مئلز بی بی سی، واشنگٹن

	امریکہ سب سے زیادہ گرین ہاؤس گیس پیدا کرنے والا ملک ہے۔

امریکہ سب سے زیادہ گرین ہاؤس گیس پیدا کرنے والا ملک ہے اور اس نے کیوٹو معاہدے پر دستخط سے بھی انکار کیا تھا جس کے تحت اس طرح کی گیسوں کی ایک حد مقرر کی گئی تھی۔

لہذا امریکی صدر جارج بش نے کاربن ڈائی اوکسائڈ کی پیداوار کو کم کرنے کے لیے نئے سائنسی طریقے پر زور دیا ہے۔

انہوں نے اس سال کے سٹیٹ آف دی یونین خطاب میں کہا تھا کہ امریکہ کو ’تیل کا نشہ‘ ہے ۔ ’امریکہ کو مقابلے میں رہنے کے لیے کم خرچ توانائی کی ضرورت ہے اور ’تیل کے انحصار‘ کو ختم کرنے کا بہترین طریقہ نئی ٹیکنالوجی ہے‘۔

اب چیونکہ کانگریس کےدونوں ایوانوں پرڈیموکریٹک پارٹی کا قبضہ ہے اس لیے سینئر ڈیموکریٹس کو توقع ہے کہ وہ صدر بش کو اس بات پر راضی کرنے میں کامیاب ہو جائیں گے کہ گرین ہاؤس گیسوں پر حد مقرر کرنے کی ضرورت ہے۔

سینیٹ کی توانائی کی کمیٹی کے نئے رہنما ڈیموکریٹک پارٹی کے جیف بِنگامن کا کہنا ہے ’ہمارے پاس اب موقع ہے کہ صاف توانائی، دوبارہ قابل استعمال توانائی، عالمی حدت، ماحولیاتی تبدیلی جیسے مسائل کو اجاگر کریں کیو نکہ ایسا کرنا گزشتہ کئی سالوں سے ممکن نہیں تھا۔

بِنگامن وفاقی سطح پرگرین ہاؤس گیسوں کی پیداوار پر حد لاگو کرنے کے حق میں ہیں۔ حال میں انہوں نے دوسرے سیاستدانوں کے ساتھ مل کر صدر بش کوایک خط لکھا جس میں انہوں نے صدر بش سے کہا کہ وہ عالمی حدت کے مسئلے کا حل نکالنے کے لیے دوسرے ڈیموکریٹس کے ساتھ کام کریں۔