غار میں اترنے کے لیے عمودی فاصلہ بھی طے کرنا پڑا

یوکرائن کی نو ارکان پر مشتمل ٹیم نے دنیا کے گہرے تین غار کروبیرا میں زمین کی سطح کے نیچے دوہزار اسّی میٹر یعنی دو کلومیٹر سے زیادہ فاصلہ طے کیا۔

واضح رہے کہ جنوبی افریقہ میں سونے کی کانوں میں کانکن تین ہزار چار سو میٹر گہرائی میں جاتے ہیں۔ لیکن غار سر کرنے والوں کے لیے دو ہزار اسّی میٹر اب تک سب سے زیادہ فاصلہ ہے۔

پانی نے راستہ روکا

اس ٹیم نے غار میں گہرائی تک جانے کے لیے اس سے پہلے جانے والی ٹیموں کے بنائے ہوئے راستے پر سفر کیا۔ ٹیم کا خیال ہے شاید اس غار میں مزید گہرائی تک جایا جا سکتاہے۔

ٹیم کے ارکان نے غار کی گہرائی میں یہ سفر پانچ ٹن وزنی سامان کے ساتھ طے کیا۔ راستے میں انہیں سخت ٹھنڈے پانی کے تالابوں میں سے بھی گزرنا پڑا اور کہیں کہیں عمودی اترائی بھی تھی۔ کچھ مقامات پر راستہ اتنا تنگ تھا یا پتھروں کے گرنے کی وجہ سے بند ہو چکا تھا کہ گزرنے کے لیے انہیں دھماکے کر کے راہ بنانا پڑی۔

تفصیلات  مہم کی تفصیلات اور تصاویر نیشنل جیوگرافک کے اس ماہ کے شمارے میں دیکھی جا سکتی ہیں

انہوں نے پہلا کیمپ سات سو میٹر، دوسرا بارہ سو پندرہ میٹر، تیسرا چودہ سو دس اور چوتھا سولہ سو چالیس میٹر کی گہرائی میں بنایا۔ وہ انہی کیمپوں میں کھانا بناتے تھے اور ایک کیمپ میں چھ لوگ اکٹھے سوتے تھے۔ بعض اوقات انہوں نے بغیر رکے بیس بیس گھنٹے کام کیا۔

اگست ستمبر دو ہزار چار میں چھپن افراد پر مشتمل ایک ٹیم نے اسی غار میں کافی گہرائی تک سفر کیا۔ انہیں بہت سی رکاوٹوں کا سامنا کرنا پڑا تھا۔ ان کا راستہ پانی کے ایک تالاب نے روک لیا تھا۔ ٹیم کے رکن نے پانی میں اترنے کی کوشش کی تو انہیں معلوم ہوا کہ ان کے کپڑوں میں سوراخ ہو چکے ہیں اور ٹھنڈ کی وجہ سے آگے نہیں بڑھ سکیں گے۔

بالآخر ٹیم کے ارکان ڈینس کرتا اور دمیتری فیدوتوو پانی کے نیچے سو میٹر لمبے ایک تنگ راستے میں سے آگے بڑھنے میں کامیاب ہوئے۔

اکتوبر میں نو افراد پر مشتمل ایک ٹیم دوبارہ بھیجی گئی جس نے وہیں سے اپنا سفر شروع کیا جہاں سے پہلی ٹیم واپس گئی تھی۔ غار کے سب سے نچلے حصہ میں انہیں راستوں کا ایک نیا سلسلہ اور گڑھے ملے جن میں اُترا جا سکتا تھا۔

مزیر گہرائی تک جانے کا عزم

انیس اکتوبر دو ہزار چار کو ٹیم کے سربراہ یوری کاسخانایک گڑھے میں اترے تو ان کے پاس گہرائی بتانے والے آلے نے دکھایا کہ وہ دو ہزار میٹر کی گہرائی میں ہیں۔

ٹیم نے اس گڑھے کا نام ’گیم اوور‘ یعنی ’کھیل ختم‘ رکھا لیکن اب وہ واپس جا کر غار میں مزید گہرائی تک جانے کے امکان کا جائزہ لینا چاہتے ہیں۔